Narynqolda Muqaǵalı Maqataevtyń eskertkishi ashyldy

4879
Adyrna.kz Telegram

Búgin aqıyq aqyn Muqaǵalı Maqataevtyń 90 jyldyǵyna oraı  onyń týǵan jerinde eńseli eskertkish ashyldy dep habarlaıdy "Adyrna" ulttyq portaly.

Mereıtoılyq sharalarǵa Almaty oblysynyń ákimi Amandyq Batalov, Mádenıet jáne sport mınıstri Aqtoty Raıymqulova, QR Jazýshylar odaǵynyń tóraǵasy Ulyqbek Esdáýlet, aqynnyń uly Juldyz Maqataev pen kelini Baqytgúl Aıdarova, TÚRKSOI uıymynyń ókilderi, Parlament depýtattary, el zııalylary jáne aýdan jurtshylyǵy qatysqan.

Almaty oblysy ákiminiń baspasóz qyzmeti habarlaǵandaı, eskertkishti daıyndaýǵa oblystyq bıýdjetten 61,1 mln teńge jumsalǵan. Jumysty merdiger uıym «Taıqazan» JShS atqardy. Eskertkish qoladan quıylǵan, tuǵyry granıtten daıyndalǵan. Jalpy eskertkishtiń bıiktigi – 8,2 m, avtory – sáýletshi A.Rústembekov, músinshisi – Q.Kákimov. Eskertkish ornatylǵan ortalyq saıabaqtaǵy alańdy abattandyrýǵa zor mán berilgen. Osy maqsatqa óńir bıýdjetinen 70,1 mln teńge qarastyrylyp, aýmaq kógaldandyrylǵan, sýarý júıesi júrgizildi, jaryq shamdary ornatylyp, shaǵyn sáýlettik formalar qoıyldy.

Saltanatty sharaǵa qatysqan Memlekettik hatshy Qyrymbek Kósherbaev:

«Muqaǵalı - jyrdyń asyl qazynasy. Ol - ótken men jańanyń arasyn jalǵaǵan altyn kópir. Elbasy men Prezıdenttiń bastamasymen aqynnyń ǵasyrlyq toıyn IýNESKO kóleminde ótkizýge usynystar daıyndalýda. Búgingi toı qutty bolsyn. Halqymyzdyń rýhy Muqaǵalı jyrlaryndaı taza, Hantáńirindeı asqaq, Kólsaıdaı kórikti bolsyn», - deı kele, jınalǵandarǵa QR Prezıdenti Qasym-Jomart Toqaevtyń arnaıy quttyqtaýyn oqyp berdi.

Budan soń QR Mádenıet jáne sport mınıstri Aqtoty Raıymqulova, QR Jazýshylar Odaǵynyń tóraǵasy, aqyn Ulyqbek Esdáýlet, TÚRKSOI uıymynyń ókili Atageldi Kúltegin Muqaǵalıdyń qazaqtyń ǵana emes, tutas túrki áleminiń, adamzattyń aqyny ekenin tilge tıek etip, toıdyń rýhanı mańyzyn erekshe atap ótti.

"Adyrna" ulttyq portaly.

Pikirler