(مۇعالىمدەر كۇنىندەگى مەرەيسوز)
ومىردە ۇستازدان كەندە بولماپپىز. سولاردىڭ ىشىندە جازۋ ونەرىنە باۋلىعان ءۇش ۇستازدىڭ ورنى بولەك. شانجارحان بەكماعامبەتوۆ، سامەن قۇلباراق، بيبايشا الپىسباەۆا... بۇلار – ءبىر كەزدەگى قاراتەرەڭ ورتا مەكتەبىنىڭ ورىمدەي جاس مۇعالىمدەرى. ۇشەۋى دە كەز-كەلگەن شاكىرتىنىڭ كەۋدەسىندەگى «جانايىن دەگەن ءبىر شىراقتى» (عالي ورمانوۆ) تۇتاتا بىلەتىن-ءدى. سول تۇستا ولاردىڭ جاسى جيىرمانىڭ شاماسىندا عانا بولاتىن. تەڭىز قولتىعىنداعى قاراتەرەڭگە ءبىرى كازگۋ-ءدى، ەكىنشىسى كازپي-ءدى ءبىتىرىپ كەلدى. ءۇشىنشىسى قىزىلوردا پەدينستيتۋتىندا وقىپ ءجۇردى. ولار ءار جىلداردا ءبىر بالاسى شتۋرۆال، ءبىر بالاسى قالام، ءبىر بالاسى سازان ۇستاعان بالىقشى اۋىلعا كەلىپ، سول ۇعىمتال ۇلانداردىڭ جۇرەگىنە شىعارماشىلىقتىڭ وتىن جاقتى.
اۋەلى نەبارى ون جەتى جاستاعى ءسامبىتالداي بويجەتكەن بيبايشا اپايىمىز جازعان-سىزعانىمىزدى باعالاپ، سول كۇيىندە قالدىرماي، گازەت-جۋرنال رەداكتسياسىنا جولداۋدىڭ ءجون-جوباسىن كورسەتتى. شيرىعىپ تۇراتىن شامحان (شانجارحان) اعاي ابدەن سىلىكپەمىزدى شىعارىپ، ەرتەلى-كەش شىعارما جازدىردى. كوپ ۇزاماي بۇكىل كلاسس ءبىرى قالماي كوركەم دۇنيە كەستەلەپ، شابىتتىڭ جەلكەنىن كوتەرىپ كەتتى. ال ايگىلى بىلعارى قولعاپ شەبەرى شوقىر بولتەكۇلىنىڭ شاكىرتى، ءبىرىنشى رازريادتى بوكسشى سامەن اعايىمىز ءبىزدى كۇندىز كلاستا، كەشكە رينگتە تىنىمسىز توپەلەپ، قاماۋ تەرىمىزدى الىپ، ادەبيەتتىڭ ۇڭعىل-شۇڭعىلىن ۇيرەتتى.
سونىڭ پايداسىن كەيىن اۋىلدىڭ بالالارى كوردى. قاراپ جۇرمەي قارا ولەڭ قۇراستىرا جۇرەتىن قاراتەرەڭنىڭ قالامگەرلەرى بىزگە دەيىن دە جەتكىلىكتى ەدى. بىزدەن كەيىن ءتىپتى قاۋلاپ كەتتى. وسىعان مانەرى بولەك ۇلاعاتتى ءۇش ۇستازدىڭ ىقپالى بولعانى ايدان انىق.
قازىر ولاردىڭ وزدەرى دە كوشتىڭ الدىندا كەلەدى. ەسىمدەرى ەلگە تانىمال. ءبىرى پۋبليتسيست، ەكىنشىسى لينگۆيست، ءۇشىنشىسى سىنشى. ۇشەۋىنىڭ جازعان دۇنيەلەرىن جيناقتاسا، شاعىن كىتاپحانانىڭ ءبىر بۇرىشىن تولتىرۋعا بولار.
بيبايشا الپىسباەۆا – قىزىلوردادا شىعاتىن «اقپارات kz» گازەتىنىڭ باس رەداكتورى، جۇيرىك جۋرناليست، مىقتى مەديامەنەدجەر.
شانجارحان بەكماعامبەتوۆ – قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ كانديداتى، ءتىل گەنەتيكاسىن زەرتتەپ جۇرگەن بىلىكتى عالىم.
سامەن قۇلباراق – م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى، الەۋەتتى ادەبيەتتانۋشى.
و باستا مەكتەپ قابىرعاسىندا قالامىمىزدى دۇرىستاپ ۇشتاپ بەرگەن وسى ءۇش ۇستازدى قازاقتىڭ ءۇش بيىندەي قادىر تۇتساق، ارتىق بولماس. مەرەكەلەرىڭىز قۇتتى بولسىن، مەنىڭ مايتالمان مۇعالىمدەرىم!
باۋىرجان ومارۇلى
