بۇگىننەن باستاپ قازاقستاندا توي وتكىزۋگە رۇقسات بەرىلدى. پرەمەر-ءمينيستردىڭ ورىنباسارى ەرالى توعجانوۆ تويعا رۇقسات بەرۋدىڭ سەبەبىن ءتۇسىندىرىپ بەردى، دەپ حابارلايدى "ادىرنا" ۇلتتىق پورتالى.
- ەلىمىزدە بىرقاتار ءىس-شارالاردى وتكىزۋگە رۇقسات بەردىك، بىراق قاتاڭ شارتتارى بار. بىرىنشىدەن، شاراعا قاتىسۋشىلاردىڭ Ashyq-تا "جاسىل" مارتەبەسى بولۋى كەرەك. ءبىز ەپيدەميولوگيالىق جاعدايدى ەسكەرە وتىرىپ، بىرتىندەپ قالىپتى ومىرگە ورالۋىمىز كەرەك. سالتاناتتى شارالاردىڭ وتكىزۋگە رۇقسات بەرۋ - بۇل تەك توي-تومالاق وتكىزۋگە عانا قاتىستى ەمەس. ءبىرىنشى كەزەكتە ماسەلە شاعىن جانە ورتا بيزنەستى قولداۋ توڭىرەگىندە بولىپ وتىر. ال رۇقسات بەرىلىپ تۇرسا، جالپى قازاقستان بويىنشا بارلىعى توي وتكىزە الادى دەگەن ءسوز ەمەس. كوروناۆيرۋستى باقىلاۋ مىندەتى الىنىپ تاستالعان جوق. ەلىمىزدە سالتاناتتى ءىس-شارالاردى وتكىزۋ قاتاڭ باقىلاۋدا بولاتىنىن ەسكە سالعىم كەلەدى. قازاقستاندا كۆي-ءدىڭ تارالۋىن باقىلاۋ مەن توقتاتۋ شارالارى كۇن تارتىبىنەن تۇسپەيدى، - دەدى ەرالى توعجانوۆ ۇكىمەت ۇيىندە وتكەن بريفينگتە.
ونىڭ ايتۋىنشا، اپتا سايىن سانيتارلىق-ەپيدەميولوگيالىق جاعداي زەردەلەنەدى، سانيتارلىق تالاپتارعا ساي كەلمەيتىن تويلاردى انىقتاۋ شارالارى جالعاسا بەرەدى.
ايتا كەتسەك، 27 قىركۇيەكتەن باستاپ سالتاناتتى، ەسكە الۋ جانە وتباسىلىق شارالاردى (بانكەت، ۇيلەنۋ تويى، مەرەيتوي) وتكىزۋگە رۇقسات بەرىلدى. "جاسىل" ايماقتا تۇرعان وڭىرلەردە زال 50%-عا دەيىن عانا تولۋى كەرەك، 100 ورىننان اسپاۋى شارت. "سارى" ايماقتا دا 50%-عا دەيىن، 70 ورىننان اسپاۋعا ءتيىس. "قىزىل" ايماقتا 50%-عا دەيىن، 50 ورىننان اسپاۋى كەرەك. سونىمەن قاتار فورۋمدار، كورمەلەر، مارافوندار وتكىزۋگە بولادى.
"ادىرنا" ۇلتتىق پورتالى
