Búginnen bastap Qazaqstanda toı ótkizýge ruqsat berildi. Premer-mınıstrdiń orynbasary Eraly Toǵjanov toıǵa ruqsat berýdiń sebebin túsindirip berdi, dep habarlaıdy "Adyrna" ulttyq portaly.
- Elimizde birqatar is-sharalardy ótkizýge ruqsat berdik, biraq qatań sharttary bar. Birinshiden, sharaǵa qatysýshylardyń Ashyq-ta "jasyl" mártebesi bolýy kerek. Biz epıdemıologııalyq jaǵdaıdy eskere otyryp, birtindep qalypty ómirge oralýymyz kerek. Saltanatty sharalardyń ótkizýge ruqsat berý - bul tek toı-tomalaq ótkizýge ǵana qatysty emes. Birinshi kezekte másele shaǵyn jáne orta bıznesti qoldaý tóńireginde bolyp otyr. Al ruqsat berilip tursa, jalpy Qazaqstan boıynsha barlyǵy toı ótkize alady degen sóz emes. Koronavırýsty baqylaý mindeti alynyp tastalǵan joq. Elimizde saltanatty is-sharalardy ótkizý qatań baqylaýda bolatynyn eske salǵym keledi. Qazaqstanda KVI-diń taralýyn baqylaý men toqtatý sharalary kún tártibinen túspeıdi, - dedi Eraly Toǵjanov Úkimet úıinde ótken brıfıngte.
Onyń aıtýynsha, apta saıyn sanıtarlyq-epıdemıologııalyq jaǵdaı zerdelenedi, sanıtarlyq talaptarǵa saı kelmeıtin toılardy anyqtaý sharalary jalǵasa beredi.
Aıta ketsek, 27 qyrkúıekten bastap saltanatty, eske alý jáne otbasylyq sharalardy (banket, úılený toıy, mereıtoı) ótkizýge ruqsat berildi. "Jasyl" aımaqta turǵan óńirlerde zal 50%-ǵa deıin ǵana tolýy kerek, 100 orynnan aspaýy shart. "Sary" aımaqta da 50%-ǵa deıin, 70 orynnan aspaýǵa tıis. "Qyzyl" aımaqta 50%-ǵa deıin, 50 orynnan aspaýy kerek. Sonymen qatar forýmdar, kórmeler, marafondar ótkizýge bolady.
"Adyrna" ulttyq portaly
