سولتۇستىك قازاقستان وبلىسىنداعى لەبياجە اۋىلىندا 130 تاۋىق، 290 قاز بەن 582 ۇيرەك قىرىلىپ، ۆەتەرينارلىق كارانتين جاريالاندى، دەپ حابارلايدى "ادىرنا" ۇلتتىق پورتالى.
24 قىركۇيەكتە سولتۇستىك قازاقستان وبلىسىنداعى لەبياجە اۋىلىنداعى 7 شارۋاشىلىقتا قۇس تۇماۋى انىقتالعان.
وڭىرلىك ۆەتەريناريا ديرەكتسياسى مالىمەتىنشە، 21-26 قىركۇيەك ارالىعىندا اۋىلدا تاۋىق، ۇيرەك جانە قاز جاپپاي ولگەن، بارلىعى 1003 باس. قازىر قىرىلعان قۇستار تۇگەل ورتەلگەن. سقو ۆەتەريناريا باسقارماسىنداعىلار تۇماۋ جابايى قۇستاردان جۇعۋى مۇمكىن دەگەن بولجام جاساپ وتىر.
- ۆەتەرينارلىق قىزمەت ەپيزووتيالىق تەكسەرۋ جۇرگىزدى، ماتەريال ىرىكتەلىپ، زەرتتەۋ ءۇشىن زەرتحاناعا جىبەرىلدى. 24 قىركۇيەكتە "قۇس تۇماۋى" دياگنوزىن راستاۋ ناتيجەسى الىندى. اۋرۋدىڭ ىقتيمال كوزى - جابايى قۇستار، ويتكەنى بۇل ەلدى مەكەندە اققۋلار، ۇيرەكتەر جانە باسقا دا جابايى قۇستار مەكەندەيتىن سۋ قويماسى بار، - دەدى وبلىستىق ۆەتەريناريا باسقارماسىنىڭ الدىن الۋ ءبولىمىنىڭ باسشىسى قايىرلى قازانوۆ.
ماماندار 24 قىركۇيەكتە اۋىرعان ءۇي قۇستارىنان سىناما العان. ناتيجەسىندە اۋرۋ قۇس تۇماۋى ەكەنى انىقتالىپتى. قازىر وڭىردەگى وزگە دە قۇس شارۋاشىلىقتارىندا تۇماۋدىڭ الدىن الۋ ماقساتىندا جاپپاي تەكسەرۋ ءجۇرىپ جاتىر.
