Soltústik Qazaqstan oblysyndaǵy Lebıaje aýylynda 130 taýyq, 290 qaz ben 582 úırek qyrylyp, veterınarlyq karantın jarııalandy, dep habarlaıdy "Adyrna" ulttyq portaly.
24 qyrkúıekte Soltústik Qazaqstan oblysyndaǵy Lebıaje aýylyndaǵy 7 sharýashylyqta qus tumaýy anyqtalǵan.
Óńirlik veterınarııa dırekııasy málimetinshe, 21-26 qyrkúıek aralyǵynda aýylda taýyq, úırek jáne qaz jappaı ólgen, barlyǵy 1003 bas. Qazir qyrylǵan qustar túgel órtelgen. SQO veterınarııa basqarmasyndaǵylar tumaý jabaıy qustardan juǵýy múmkin degen boljam jasap otyr.
- Veterınarlyq qyzmet epızootııalyq tekserý júrgizdi, materıal iriktelip, zertteý úshin zerthanaǵa jiberildi. 24 qyrkúıekte "qus tumaýy" dıagnozyn rastaý nátıjesi alyndy. Aýrýdyń yqtımal kózi - jabaıy qustar, óıtkeni bul eldi mekende aqqýlar, úırekter jáne basqa da jabaıy qustar mekendeıtin sý qoımasy bar, - dedi oblystyq veterınarııa basqarmasynyń aldyn alý bóliminiń basshysy Qaıyrly Qazanov.
Mamandar 24 qyrkúıekte aýyrǵan úı qustarynan synama alǵan. Nátıjesinde aýrý qus tumaýy ekeni anyqtalypty. Qazir óńirdegi ózge de qus sharýashylyqtarynda tumaýdyń aldyn alý maqsatynda jappaı tekserý júrip jatyr.
