قازاقستان كابۋلدەن 35 قانداستى الىپ شىقتى. قىركۇيەكتىڭ باسىندا ەلگە كەلگەن قانداستار وسى ۋاقىتقا دەيىن كارانتيندە وتىرعان ولاتىن. مەملەكەت قانداستارعا تۇراتىن ورىنمەن قامتاماسىز ەتتى. الداعى ۋاقىتتا ولارعا جۇمىس پەن ءبىر مەزەتتىك جاردەماقى بەرۋ ماسەلەسى دە قاراستىرىلۋدا. قانداستار اۋعانستاندا قانداي قيىندىقتار كورگەنىن كتك تەلەارناسىنا بەرگەن سۇحباتتا ايتقان.
فايزۋللا ءاحماديدىڭ وتباسى قازىرگى تاڭدا بۋراباي اۋدانىنداعى ءۇش بولمەلى ۇيدە تۇرىپ جاتىر. قازاقستانعا ول ايەلى مەن قارىنداسىن جانە بەس بالاسىن اكەلگەن. ولار سوڭعى ءتورت جىلدا قازاقستانعا كوشۋگە تالپىنعان، الايدا قۇجاتتارىمەن قيىندىقتار بولىپتى.
فايزۋللا احمادي اۋعانستانداعى قازاقتار جايلى بىلاي دەيدى: ء"بىز ورتا ءجۇزدىڭ قوڭىرات رۋىنانبىز. ءبىز پاكىستاندا، يراندا جۇمىس ىستەگەن ەدىك، الايدا كەيىن ول جاقتا قيىندىقتار پايدا بولدى. اۋعانستانعا كەلگەنىمىزگە كوپ بولمادى. كەيىن ونى تالىبتەر باسىپ الدى. بىزگە ەلشىلىك قىزمەتكەرلەرى شىعىپ، الماتىعا ۇشىپ كەتۋ مۇمكىندىگى تۋىنداعانىن ايتتى. ول جاقتا مىڭعا جۋىق قازاق قالدى، ولار دا قازاقستانعا كەلگىسى كەلەدى. ولار ول جاقتا تۇرۋعا قورقادى، جۇمىس تابۋ دا وتە قيىن. ولارعا ء"وز وتاندارىڭا كەتىڭدەر" دەيدى.
قازىر اۋعانستاننان كەلگەن قازاقتار ءۇشىن باستى ماسەلە جۇمىس تابۋ بولىپ وتىر. مەملەكەت ول جاعىنان كومەكتەسۋگە دايىن.
"ادىرنا" ۇلتتىق پورتالى
