قىمباتشىلىق: ۇن، نان، ماكارون باعاسى شارىقتايدى

3679
Adyrna.kz Telegram

نارىقتى تاعى قىمباتشىلىق كۇتىپ تۇر. بۇل جولى دۇكەندەردە ۇن، ماكارون مەن نان سەكىلدى استىق ونىمدەرىنىڭ باعاسى وسەدى. استىق ءوندىرىسى سالاسىنىڭ ماماندارىنىڭ ايتۋىنشا، وعان سەبەپ جەتەرلىك. بۇل تۋرالى “ادىرنا” ۇلتتىق پورتالى "كتك" ارناسىنا سىلتەمە جاساپ حابارلايدى.

"ازىق-تۇلىك كەلىسىم-شارت كورپوراتسياسى" ديقانداردان بيداي ساتىپ الۋ باعاسىن كوتەرىپ جىبەرگەن. ال جەكە كومپانيالار نارىقتى جاۋلاپ الۋ ءۇشىن ديقاندارعا ودان دا جوعارى ۇسىنىپ جاتىر. ونىڭ ءبارى اينالىپ كەلىپ دۇكەندەگى ۇن مەن ناننىڭ باعاسىن وسىرەرى ءسوزسىز دەيدى ماماندار.

سولتۇستىك قازاقستان وبلىسىنىڭ ديقانى مارات قارىمساقوۆ بيىلعى ءونىمىن جىلداعىدان قىمباتىراق ساتقىسى كەلەدى. ويتكەنى بيىلعى ءونىمى بىلتىرعىدان 25 پايىز كەم.

"110-115 مىڭنان ساتىپ الامىز دەپ جاتىر. كەرەك دەسە وزدەرى كەلىپ الىپ كەتپەكشى. مەنىڭ استىق القابىمنىڭ ءالى 60 پايىزدان استامى جينالعان جوق. اۋا رايى استىقتىڭ تولىق جەتىلىپ پىسۋىنە مۇمكىندىك بەرىپ تۇر. وعان دەيىن باعا دا تاعى وسە تۇسسە بىزگە جاقسى بولار ەدى", – دەيدى مارات قارىمساقوۆ.

قازاقستان استىعىنىڭ نەگىزگى وپەراتورى "ازىق-تۇلىك كەلىسىم-شارت كورپوراتسياسى" بىلتىر بيداي تونناسىن 83 مىڭ تەڭگەدەن السا، بيىل 103 مىڭعا دەيىن كوتەرىپ تاستادى. ول شارۋالاردىڭ بانك الدىنداعى قارىزىن جابۋعا نەمەسە تەحنيكالىق جاراقتارىن قامداپ الۋعا جەتكىلىكتى. بىراق ول اقشا دۇكەندەردەگى ازىق باعاسىنا بارىپ قوسىلادى دەيدى ماماندار.

ء"بىزدىڭ ۇكىمەتتىڭ شارۋالاردىڭ قارجىلىق شىعىنىن وتەيتىن مۇمكىندىگى جوق. جالعىز جولى – الەۋمەتتىك ماڭىزى بار ازىق تۇرلەرىنىڭ باعاسىن بارىنشا قالتاعا قولايلى دەڭگەيدە ۇستاپ تۇرۋ. ونىڭ ۇستىنە باعانىڭ وسۋىنە كەلسەك، ول استىق باعاسىنىڭ وسۋىنە عانا بايلانىستى ەمەس. كولىك اقىسى، جانارماي، ەلەكتر جارىعى، جالاقى جانە باسقا دا تولىپ جاتقان جاناما اسەرلەر بار", – دەيدى قازاقستان استىق وداعىنىڭ وكىلى ەۆگەني كارابانوۆ.

مينيسترلىكتىڭ مالىمدەۋىنشە، بيداي بيىل الەم بويىنشا از جينالىپ جاتىر. مىسالى، كانادادا ءونىم بيىل 8 ملن تونناعا، رەسەيدە 13 ميلليون تونناعا، اقش-تا شامامەن 4 ميلليون تونناداي ازايىپ قالۋى مۇمكىن. ماماندار ءبىزدىڭ ەلدە دە بيىلعى قۋاڭشىلىق سالدارىنان قامبالارعا استىق شامامەن 25 پايىز كەم ءتۇسۋى مۇمكىن دەيدى. ال مال ازىعى ءتىپتى 30-دان 50 پايىزعا دەيىن كەمۋى عاجاپ ەمەس.

استىققا قاتىستى تاعى ءبىر ماسەلە – بيىل از تۇسسە دە، ىشكى نارىقتى تولتىرۋعا جەتكىلىكتى. بىلتىرعىدان قالعانىن قوسا العاندا تاعى 6 جارىم ميلليون تونناسىن سىرتقا ساتۋعا بولادى. ءبىزدىڭ بيدايىمىز بەن ۇنىمىزدىڭ نەگىزگى تۇتىنۋشىسى وزبەكستان، تاجىكستان، اۋعانستان بولىپ كەلگەن ەدى. اۋعان نارىعى ونداعى جاعدايعا بايلانىستى جابىلىپ قالدى. ەندى ءبىزدىڭ ديقاندار 3 ميلليون توننا استىقتى قايدا جىبەرەرىن بىلمەي داعدارىپ وتىر.

پىكىرلەر