ايماق باسشىسى ماحامبەت دوسمۇحامبەتوۆتىڭ توراعالىعىمەن جيىن وتكىزىلىپ، وڭىردەگى حالىق ساناعىنا قاتىستى جۇمىستار پىسىقتالدى.
جيىندا قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ اتىراۋ وبلىسى بويىنشا دەپارتامەنتىنىڭ باسشىسى گاليا مۇحانعاليەۆا وسى ۋاقىتقا دەيىن جاسالعان جۇمىستارعا توقتالدى.
«حالىق ساناعىنىڭ ونلاين رەجيمدە ءوتۋ ارتىقشىلىقتارى مەن ءتارتىبىن ءتۇسىندىرۋ ماقساتىندا اتىراۋ قالاسى اكىمدىگىنىڭ قولداۋىمەن 7-13 قىركۇيەك ارالىعىندا ستاتيستيكا دەپارتامەنتى ماماندارىمەن اتىراۋ قالاسىنداعى 30-دان اسا ءىرى كاسىپورىندار مەن مەكەمەلەردىڭ قىزمەتكەرلەرى اراسىندا كەزدەسۋلەر ۇيىمداستىرىلىپ، ونلاين ساناقتان ءوتۋ بويىنشا پراكتيكالىق كومەكتەر كورسەتىلدى. اتقارىلعان شارالاردىڭ ناتيجەسىندە، 2021 جىلدىڭ 18 قىركۇيەگىندەگى دەرەكتەرگە سايكەس، وبلىس بويىنشا حالىق ساناعىنان ونلاين رەجيمىندە وتكەن تۇرعىنداردىڭ سانى 145 089 ادامعا جەتىپ، وبلىس حالقىنىڭ 21,9%-ى قامتىلدى»،-دەدى ول.
سونداي-اق، دەپارتامەنت باسشىسىنىڭ سوزىنشە، ۇلتتىق حالىق ساناعىنىڭ نەگىزگى كەزەڭىندە وبلىس بويىنشا 898 ادام ۋاقىتشا جۇمىسقا تارتىلسا، ونىڭ ىشىندە 111 نۇسقاۋشى-باقىلاۋشى جانە 787 ينتەرۆيۋەر بولماق.
ايتا كەتەيىك، حالىق ساناعىنان ونلاين رەجيمىندە ءوتۋ مۇمكىندىكتەرىن كەڭەيتۋ ماقساتىندا، وبلىستا 90-نان استام ۋچاسكەدە «حالىق ساناعىنان ءوز بەتىنشە ءوتۋ بۇرىشتارى» قۇرىلىپ، 50-گە تارتا ەرىكتىلەر ۇگىت-ناسيحات جۇمىستارىنا تارتىلعان.
ايماق باسشىسى ماحامبەت دوسمۇحامبەتوۆ وڭىردەگى حالىق ساناعىن جوعارى دەڭگەيدە وتكىزۋدى تاپسىردى.
«ول ءۇشىن الەۋمەتتىك جەلىلەر مەن بۇقارالىق اقپارات قۇرالدارىندا تۇسىندىرمە جۇمىستارىن كۇشەيتىپ، تۇرعىنداردىڭ ينتەرنەت جەلىسى ارقىلى ونلاين رەجيمدە ءوتۋى ۇيىمداستىرىلۋى قاجەت. وعان قوسا، ساناقتىڭ نەگىزگى كەزەڭنىڭ نۇسقاۋشى – باقىلاۋشىلار مەن ماماندار ءبولىنىسىن قالىپتاستىرا وتىرىپ، تەز ارادا جۇمىسقا الۋ جۇمىستارى قولعا الىنسىن»،-دەدى م.دوسمۇحامبەتوۆ.
ەسكە سالا كەتەيىك، ۇلتتىق حالىق ساناعىنىڭ نەگىزگى كەزەڭى وسى جىلدىڭ 1 قىركۇيەگىندە ونلاين فورماتتا باستالعان بولاتىن. بۇل جۇمىستار بيىل 15 قازانعا دەيىن جالعاسادى.
