اح، كاكايا جيرەنشينا!

2925
Adyrna.kz Telegram

(الاقانداي ەسسە)

بىزگە بىرىنەن-ءبىرى وتكەن مىقتى قىز-جىگىتتەرمەن بىرگە وقۋ باقىتى بۇيىرىپتى. سونىڭ ءبىرى – بۇگىنگى ۇلتتىق تەلەجۋرناليستيكانىڭ قولتاڭباسى بولەك مايتالمانى ساۋلە جيرەنشينا. ادەتتە، جۋرفاكقا وقۋعا تۇسكەن ەلۋ ستۋدەنتتى ەكى توپقا تەڭ ءبولىپ تاستايتىن. سولاردى بولەتىن كەزدە دە ەشكىم كوپ ويلانىپ جاتپايدى. مەكتەپتى جاڭا بىتىرگەن شيكىوكپە شوجەلەردى ءبىر توپقا ۇيىرەدى دە، وندىرىستە بىلەك سىبانىپ، ازداپ تەر توگىپ، جۇمىس ىستەپ كەلگەندەردى ەكىنشى توپقا اپارىپ كوگەندەيدى. وقۋعا ءسال قاتايىڭقىراپ تۇسكەن ءبىز جوعارعى توپتامىز. سوندىقتان ءالى ەشنارسە كورىپ ۇلگەرمەگەن ەكىنشى توپقا ەپتەپ شەكەمىزدەن قارايتىنىمىز دا راس. بىراق ۇلكەن-اۋ دەپ ەڭبەكشىلدەردەن ىعىپ جۇرگەن مەكتەپشىلدەردى كورمەدىك. شەتىنەن شيراق. سويلەسە سويىپ تۇسەدى. ويلاسا ويىپ تۇسەدى. ال تويلاسا... اتاي كورمەڭىز...

سولاردىڭ ىشىندە تالدىقورعان جاقتان كەلگەن تومپيعان اپپاق قىز ءتىپتى پىسىق. ءوزىنىڭ بويى ءبىر-اق تۇتام. سول ءبىر جاپىراقتىعىنا قاراماستان وتە ەپتى. ورىسشاعا اسا جۇيرىك. ەكى تىلدە جورعاداي جوسىلادى. ءبىر نارسە بىلگىسى كەلسە، كوكەيىڭدەگىنى كومەيىڭنەن سۋىرىپ الادى. ايتقان ءسوزىڭ ءوز الدىنا، ءالى اۋزىڭنان شىعا قويماعان ءسوزىڭنىڭ دە نە تۋرالى ەكەنىن شامالاپ سەزىپ تۇرادى. ءسويتىپ، ەپتى ەكەنىن دە، تەكتى ەكەنىن دە ساعان بىردەن ۇقتىرادى. «ءاي، الىسقا باراتىن قىزسىڭ-اۋ» دەدىك ىشتەي...

ەكىنشى كۋرستان كەيىن بولمەلەس ءباھادۇر، بۇرىنعىنىڭ ادامى، بۇگىنگىنىڭ اقساقالى – تالعات باتىرحاننىڭ شاۋجايىنا جارماسىپ، تالدىقورعان وبلىسى اقسۋ اۋداندىق گازەتىنە وندىرىستىك پراكتيكاعا باردىق. شاعىن عانا بەرەكەلى باسىلىم – «ءومىر نۇرىندا» ءومىرىمىز ەندى عانا نۇرلانا باستاعان كەزدە قاتارىمىزعا ساۋلە قوسىلدى. وسى اۋداننىڭ پەرزەنتى. اكە-شەشەسى اۋدان ورتالىعىنىڭ ىرگەسىندەگى كوكوزەك اۋىلىندا تۇرادى. ءوزى سونداي وتكىر. ەل بيلەگەن اتا-بابالارىنا تارتقان كەڭ قولتىق تاكەڭ ەكەۋمىز ءبىر سۋرەتتەمەنى بەس كۇن جازىپ، ىرعالىپ-جىرعالىپ جۇرگەنىمىزدە الگى جۇدىرىقتاي قىز تىپىڭ-تىپىڭ ەتىپ تەز قيمىلداپ، بەس-التى كۇندە بۇكىل ماقالاسىن جاريالاپ، الماتىعا اتتانىپ كەتتى. سول كەزدىڭ وزىندە بۇگىنگى شارۋاسىن ەرتەڭگە قالدىرمايتىنى ءوز الدىنا، ەرتەڭگى شارۋاسىن دا ءدال بۇگىن بىتىرۋگە تىرىساتىن ەدى. جاس كۇنىمدە جالقاۋلىقتى ونشا جات كورمەگەن ءوز باسىم ونى وسى قاسيەتى ءۇشىن ەرەكشە قۇرمەتتەيمىن. وسىنداي قۇرمەتىمىزدى اڭعارتۋ ءۇشىن ءار جەتىستىگىنە قۋانىپ، ءار ىسىنە سۇيسىنگەنىمىزدە «اح، كاكايا جيرەنشينا!» دەپ ەركەلەتەتىنىمىز بار.

ۇعىمتالدىعى مەن ۇقىپتىلىعىنىڭ، تەگەۋرىنى مەن تالانتىنىڭ ارقاسىندا جىپ-جيناقى جيرەنشينا جۋرناليستيكادا زور تابىسقا جەتتى. بيىكتەردى بىرىنەن-سوڭ ءبىرىن باعىندىردى. ەسىمىن ەلگە جاتتاتتى. تالاي جىلدان بەرى ۇلتتىق تەلەارنادا تابان اۋدارماي قىزمەت ىستەپ كەلەدى. انا ءبىر جىلى ەۋروپانىڭ تورىندە وتكەن حالىقارالىق تەلەسايىسقا قاتىسقانى بار. سوندا ساۋلە قىزدىڭ كادۋىلگى سايىپقىران سپورتشى سەكىلدى سەرىپپەدەي شيرىعىپ تۇرعانىن كورىپ سۇيسىنگەنبىز. كوگىلدىر ەكراننان سىرتتاي قاراپ وتىرعاننىڭ وزىندە جانىڭ تۇرشىگەتىن، جەر مەن كوكتىڭ اراسىنداعى جانكەشتى تريۋكتەردى مەنىڭ قۇيتاقانداي كۋرستاسىم قينالماي ءوزى جاساپ، جۇرتشىلىقتى ابدەن ءتانتى ەتتى.

ال ونىڭ جۋرناليستىك شەبەرلىگى، پروديۋسەرلىك الىمدىلىعى مەن رەپورتەرلىك شالىمدىلىعى جونىندە قىرعىزدىڭ «ماناس» ەپوسى سەكىلدى تاڭدى تاڭعا ۇرىپ، دامىلسىز جىرلاۋىمىزعا بولادى. ونى ەندى باسقا ءبىر جولعى اڭگىمەنىڭ ارقاۋىنا اينالدىرايىق.

* * *

سونىمەن، قازىر «اح، كاكايا جيرەنشينانى» تاعى ءبىر ايتۋعا تۋرا كەپ تۇر! سەبەبى، بۇگىن اياۋلى انا، ادال جار، ادەمى اجە، جۇيرىك جۋرناليست ساۋلە جيرەنشينانىڭ تۋعان كۇنى. امان ءجۇر، ارماندارىڭ ورىندالا بەرسىن، ساۋلە قىز!

باۋىرجان ومارۇلى

 

پىكىرلەر