1 قىركۇيەكتەن باستاپ ەلىمىزدە 18-27 جاس ارالىعىنداعى ازاماتتاردى مەرزىمدى اسكەري قىزمەتكە شاقىرۋ باستالدى. بۇل باعىتتاعى شارالار بارلىق وڭىرلەردە ۇيىمداستىرىلۋدا. اتاپ ايتساق، بيىل جىل سوڭىنا دەيىن اقتوبە وبلىسىنان مىڭنان استام سارباز اسكەر قاتارىنا الىنادى. ءبىز كۇزگى اسكەر قاتارىنا شاقىرۋ ناۋقانى تۋرالى اقتوبە وبلىستىق قورعانىس ىستەرى جونىندەگى دەپارتامەنت باسشىسى، پودپولكوۆنيك ادىلەت وتارباەۆپەن سۇحباتتاسقان ەدىك.
— 1 قىركۇيەكتە ەلىمىزدە كۇزگى اسكەر قاتارىنا شاقىرۋ ناۋقانى باستالدى. بۇل ناۋقان قاي ۋاقىتقا دەيىن سوزىلادى؟ قانشا سارباز اسكەر قاتارىنا الىنادى؟
— قازاقستان رەسپۋبليكاسى پرەزيدەنتىنىڭ بيىلعى جىلدىڭ اقپان ايىنداعى جارلىعىنا سايكەس، ەلىمىزدە 1 قىركۇيەكتەن باستاپ 18-27 جاس ارالىعىنداعى ازاماتتاردى مەرزىمدى اسكەري قىزمەتكە شاقىرۋ ءىس-شارالارى باستالدى. بۇعان دەيىن كوكتەم ايلارىندا ءبىز اقتبە وبلىسىنان 900 ساربازدى اسكەرگە اتتاندىرعان بولاتىنبىز. قازىر كۇزگى ناۋقاندى باستاپ كەتتىك.
بيىل پرەزيدەنتتىڭ تاپسىرماسىنا سايكەس قورعانىس مينيسترلىگى وتكەن جىلدارمەن سالىستىرعاندا قارۋلى كۇشتەرگە اسكەرگە شاقىرىلۋشىلاردىڭ سانىن كەزەڭ-كەزەڭىمەن ۇلعايتۋدى جوسپارلاعان بولاتىن. وسى ورايدا بيىلعى جىلدان باستاپ بارلىق وڭىردەن اسكەرگە شاقىرىلاتىنداردىڭ سانى ارتىپ وتىر. وعان مىسال، ءبىزدىڭ وڭىردەن كۇزگى ناۋقان كەزىندە مىڭنان استام جاس وتان الدىنداعى بورىشىن وتەۋگە جونەلتىلەدى. ونىڭ ىشىندە قارۋلى كۇشتەرگە — 435, شەكارا قىزمەتىنە — 150, ۇلتتىق ۇلانعا — 390, توتەنشە جاعداي مينيسترلىگىنە — 45, مەملەكەتتىك كۇزەت قىزمەتىنە ونعا جۋىق سارباز جىبەرىلەدى.
جالپى اسكەرگە 18-27 جاس ارالىعىنداعى كەيىنگە قالدىرۋعا قۇقى جوق جاستار شاقىرىلادى. ناۋقاندى ۇيىمداستىرۋ كەزەڭىندە وبلىستا بارلىق جاعداي جاسالعان. اتاپ ايتساق، اسكەر قاتارىنا شاقىرىلۋشىلاردى قابىلدايتىن وبلىستىق جيناقتاۋ پۋنكتى اقتوبە قالاسىنداعى اۋە قالاشىعى اۋدانىندا ورنالاسقان. ول جەردە سانيتارلىق نورمالاردىڭ بارلىعى ساقتالعان. پۋنكتتەگى اسكەري قىزمەتكەرلەر، مەديتسينا ماماندارى، اسكەرگە شاقىرىلۋشىلار بەتپەردە، انتيسەپتيك، باسقا دا قورعانىش قۇرالدارىمەن تۇگەل قامتىلعان.
جالپى بيىلعى جىلعى ناۋقاننىڭ ەرەكشەلىگى — وتكەن جىلمەن سالىستىرعاندا اسكەر قاتارىنا جىبەرىلەتىندەردىڭ سانى 120 ادامعا ارتىق. بۇل جاستاردىڭ ءوز ۋاقىتىندا اسكەرگە بارىپ، وتان الدىنداعى بورىشىن وتەۋىنە، بىرقاتارىنىڭ اسكەري سالانى تاڭداپ، بولاشاقتا وسى سالادا ابىرويلى قىزمەت ەتۋىنە ىقپال ەتەدى دەپ ويلايمىز.
جالپى كۇزگى ناۋقان اياسىنداعى جۇمىستار 1 قىركۇيەكتەن 30 جەلتوقسانعا دەيىن جالعاساتىن بولادى.
— بيىل كۇزگى مەرزىمدى اسكەري قىزمەتكە ساربازداردى قالاي شاقىردىڭىزدار؟ ولار قاي وڭىرلەرگە جىبەرىلەدى؟
— قازىرگىدەي نارىق زامانىندا اسكەرگە شاقىرۋ ەسەبىندە تۇرعان 18-27 جاستاعى جاستاردىڭ بارلىعى جۇمىس ىستەيتىنى بەلگىلى. سوندىقتان ءبىز ولاردىڭ تۇرعىلىقتى مەكەنجايىنا نەمەسە جۇمىس ورنىنا اسكەرگە شاقىرۋ قاعازىن جىبەرەمىز. نە بولماسا ولاردىڭ تەلەفوندارىنا 1414 ءنومىرى ارقىلى حابارلاما قالدىرامىز. وتكەن جىلدان باستاپ پاندەمياعا بايلانىستى ءبىز ازاماتتاردى اسكەر قاتارىنا حابارلاما جىبەرۋ ارقىلى شاقىرىپ جاتىرمىز.
نەگىزى دەپارتامەنت قىزمەتكەرلەرى قورعانىس ءمينيسترىنىڭ №97 بۇيرىعىنا سايكەس بارلىق 18-27 جاستاعى ازاماتتاردى الدىن الا زەردەلەيدى. ولار تۋرالى مالىمەتتەردى سۇراتىپ، جەكە ءىس قاعازىن دايىندايدى. ياعني، ناۋقان باستالماي تۇرىپ، ءبىز اسكەر قاتارىنا شاقىرىلاتىن ازاماتتارعا ىرىكتەۋ جۇرگىزەمىز. ال وبلىستان اسكەر قاتارىنا الىنعاندار ەلىمىزدىڭ بارلىق وڭىرىنە جىبەرىلەدى. ماسەلەن، ءبىزدىڭ وبلىستاعى №6655, №30238 اسكەري بولىمدەرىنە ەلىمىزدىڭ وڭتۇستىك، سولتۇستىك ايماقتارىنان جىل سايىن 200-گە جۋىق ساربازدار كەلەدى. سول سياقتى ءبىزدىڭ وبلىستان بارعان ساربازدار بىرنەشە وڭىرلەرگە ءبولىنىپ، وتان الدىنداعى بورىشىن وتەيدى.
قولدانىستاعى زاڭعا سايكەس، ازاماتتاردى مەرزىمدى اسكەري قىزمەتكە اسكەرگە شاقىرۋدى جەرگىلىكتى اتقارۋشى ورگاندار ۇيىمداستىرادى جانە قامتاماسىز ەتەدى. ءبىزدىڭ نەگىزگى مىندەتىمىز — اسكەري قىزمەتكە ەسەپكە تۇراتىنداردى تىركەۋ، ولاردىڭ ەسەبىن جۇرگىزۋ.
جالپى ەرەجەگە سايكەس ەلىمىزدە ءاربىر ەر ازامات 17 جاستان باستاپ ءبىزدىڭ اسكەري ەسەبىمىزدە تۇرادى. ال 18-27 جاس ارالىعىنداعى ازاماتتار مەرزىمدى اسكەري شاقىرۋ كوميسسياسىنىڭ، 27 جاستان باستاپ 45-55 جاسقا دەيىنگىلەر اسكەرگە مىندەتتىلەردىڭ ەسەبىندە تۇرادى. ولاردىڭ ىشىندە سولدات-سەرجانتتار، زاپاستاعى وفيتسەرلەر بار.
— قازىرگى جاستاردىڭ اسكەري ومىرگە قىزىعۋشىلىعى قالاي؟
— بۇرىن كەڭەس زامانىندا اسكەرگە بارماعان، وتان الدىنداعى بورىشىن وتەمەگەن جىگىتتەرگە جۇرت، ونىڭ ىشىندە نازىك جاندىلار باسقاشا كوزقاراسپەن قارايتىن. ماسەلەن، اعا بۋىن وكىلدەرىنىڭ كوبى كەزىندە اسكەرگە سۇرانىپ باراتىن. سودان سوڭ عانا مانساپ قۋىپ، قىزمەتكە ورنالاساتىن. قازىر زامان دا، زاڭ دا وزگەردى. سوندىقتان قازىرگى جاستار اراسىندا وزدەرى سۇرانىپ باراتىندار از. دەگەنمەن اسكەري ومىرگە قىزىعۋشىلىق تانىتاتىندار بارشىلىق. مىسالى، قازىر جاستاردىڭ 60-70 پايىزى اسكەر قاتارىنا ەرىكتى تۇردە بارادى. ارينە، شاقىرۋ قاعازىن العانىمەن، بىزگە كەلۋگە اسىقپايتىندار دا بار.
ولارعا بەلگىلەنگەن مەرزىمدە شاقىرۋ پۋنكتىنە كەلمەگەنى ءۇشىن مولشەرى 5 ايلىق ەسەپتىك كورسەتكىش ايىپپۇل سالىنادى. ال زاڭعا سايكەس اسكەري بورىشىن وتەۋدەن تۇبەگەيلى باس تارتقان ازاماتتار قازاقستان رەسپۋبليكاسىنىڭ قىلمىستىق كودەكسىنىڭ 387-بابىنا سايكەس 1 مىڭ ايلىق ەسەپتىك كورسەتكىش، ياعني، 3 ميلليونعا جۋىق تەڭگە ايىپپۇل تولەۋگە مىندەتتى.
قازىر اقتوبە وبلىسىندا 18-27 جاس ارالىعىنداعى 20 مىڭنان استام ادام بار. ونىڭ ىشىندە جوعارى ءبىلىم الىپ جۇرگەندەردى ەسەپتەگەندە اسكەرگە شاقىرىلۋى ءتيىس 9 مىڭداي جاس بار. مىنە، ءبىز وسىلاردىڭ ىشىنەن ىرىكتەپ، دەنساۋلىعى، پسيحيكاسى جاقسى، بارلىق تالاپقا ساي ساربازداردى تاڭداپ الامىز.
تاعى ءبىر ايتارىم، بۇگىنگى سارباز — كەشەگى وقۋشى. سوندىقتان وتان الدىنداعى بورىشتى وتەۋ، ونىڭ جاۋاپكەرشىلىگىن كوتەرۋدى كەز كەلگەن جاسقا مەكتەپ قابىرعاسىنان ۇيرەتىپ، ءتۇسىندىرۋ قاجەت. سونداي-اق وتباسىندا دا بۇل اڭگىمە ايتىلۋعا ءتيىس. كەز كەلگەن ەر بالا وسكەن سوڭ وتان الدىنداعى پارىزىن ادال، وجەتتىكپەن وتەۋى كەرەكتىگىن ءبىلۋى قاجەت.
— اڭگىمەڭىزگە راقمەت!
سۇحباتتاسقان داناگۇل بايمۇقاش.
"ادىرنا" ۇلتتىق پورتالى.
