1 qyrkúıekten bastap elimizde 18-27 jas aralyǵyndaǵy azamattardy merzimdi áskerı qyzmetke shaqyrý bastaldy. Bul baǵyttaǵy sharalar barlyq óńirlerde uıymdastyrylýda. Atap aıtsaq, bıyl jyl sońyna deıin Aqtóbe oblysynan myńnan astam sarbaz ásker qataryna alynady. Biz kúzgi ásker qataryna shaqyrý naýqany týraly Aqtóbe oblystyq qorǵanys isteri jónindegi departament basshysy, podpolkovnık Ádilet Otarbaevpen suhbattasqan edik.
— 1 qyrkúıekte elimizde kúzgi ásker qataryna shaqyrý naýqany bastaldy. Bul naýqan qaı ýaqytqa deıin sozylady? Qansha sarbaz ásker qataryna alynady?
— Qazaqstan Respýblıkasy Prezıdentiniń bıylǵy jyldyń aqpan aıyndaǵy Jarlyǵyna sáıkes, elimizde 1 qyrkúıekten bastap 18-27 jas aralyǵyndaǵy azamattardy merzimdi áskerı qyzmetke shaqyrý is-sharalary bastaldy. Buǵan deıin kóktem aılarynda biz Aqtbe oblysynan 900 sarbazdy áskerge attandyrǵan bolatynbyz. Qazir kúzgi naýqandy bastap kettik.
Bıyl Prezıdenttiń tapsyrmasyna sáıkes Qorǵanys mınıstrligi ótken jyldarmen salystyrǵanda Qarýly kúshterge áskerge shaqyrylýshylardyń sanyn kezeń-kezeńimen ulǵaıtýdy josparlaǵan bolatyn. Osy oraıda bıylǵy jyldan bastap barlyq óńirden áskerge shaqyrylatyndardyń sany artyp otyr. Oǵan mysal, bizdiń óńirden kúzgi naýqan kezinde myńnan astam jas Otan aldyndaǵy boryshyn óteýge jóneltiledi. Onyń ishinde Qarýly kúshterge — 435, shekara qyzmetine — 150, Ulttyq ulanǵa — 390, Tótenshe jaǵdaı mınıstrligine — 45, memlekettik kúzet qyzmetine onǵa jýyq sarbaz jiberiledi.
Jalpy áskerge 18-27 jas aralyǵyndaǵy keıinge qaldyrýǵa quqy joq jastar shaqyrylady. Naýqandy uıymdastyrý kezeńinde oblysta barlyq jaǵdaı jasalǵan. Atap aıtsaq, ásker qataryna shaqyrylýshylardy qabyldaıtyn oblystyq jınaqtaý pýnkti Aqtóbe qalasyndaǵy Áýe qalashyǵy aýdanynda ornalasqan. Ol jerde sanıtarlyq normalardyń barlyǵy saqtalǵan. Pýnkttegi áskerı qyzmetkerler, medıına mamandary, áskerge shaqyrylýshylar betperde, antıseptık, basqa da qorǵanysh quraldarymen túgel qamtylǵan.
Jalpy bıylǵy jylǵy naýqannyń ereksheligi — ótken jylmen salystyrǵanda ásker qataryna jiberiletinderdiń sany 120 adamǵa artyq. Bul jastardyń óz ýaqytynda áskerge baryp, Otan aldyndaǵy boryshyn óteýine, birqatarynyń áskerı salany tańdap, bolashaqta osy salada abyroıly qyzmet etýine yqpal etedi dep oılaımyz.
Jalpy kúzgi naýqan aıasyndaǵy jumystar 1 qyrkúıekten 30 jeltoqsanǵa deıin jalǵasatyn bolady.
— Bıyl kúzgi merzimdi áskerı qyzmetke sarbazdardy qalaı shaqyrdyńyzdar? Olar qaı óńirlerge jiberiledi?
— Qazirgideı naryq zamanynda áskerge shaqyrý esebinde turǵan 18-27 jastaǵy jastardyń barlyǵy jumys isteıtini belgili. Sondyqtan biz olardyń turǵylyqty mekenjaıyna nemese jumys ornyna áskerge shaqyrý qaǵazyn jiberemiz. Ne bolmasa olardyń telefondaryna 1414 nómiri arqyly habarlama qaldyramyz. Ótken jyldan bastap pandemııaǵa baılanysty biz azamattardy ásker qataryna habarlama jiberý arqyly shaqyryp jatyrmyz.
Negizi departament qyzmetkerleri Qorǵanys mınıstriniń №97 buıryǵyna sáıkes barlyq 18-27 jastaǵy azamattardy aldyn ala zerdeleıdi. Olar týraly málimetterdi suratyp, jeke is qaǵazyn daıyndaıdy. Iaǵnı, naýqan bastalmaı turyp, biz ásker qataryna shaqyrylatyn azamattarǵa irikteý júrgizemiz. Al oblystan ásker qataryna alynǵandar elimizdiń barlyq óńirine jiberiledi. Máselen, bizdiń oblystaǵy №6655, №30238 áskerı bólimderine elimizdiń ońtústik, soltústik aımaqtarynan jyl saıyn 200-ge jýyq sarbazdar keledi. Sol sııaqty bizdiń oblystan barǵan sarbazdar birneshe óńirlerge bólinip, Otan aldyndaǵy boryshyn óteıdi.
Qoldanystaǵy zańǵa sáıkes, azamattardy merzimdi áskerı qyzmetke áskerge shaqyrýdy jergilikti atqarýshy organdar uıymdastyrady jáne qamtamasyz etedi. Bizdiń negizgi mindetimiz — áskerı qyzmetke esepke turatyndardy tirkeý, olardyń esebin júrgizý.
Jalpy erejege sáıkes elimizde árbir er azamat 17 jastan bastap bizdiń áskerı esebimizde turady. Al 18-27 jas aralyǵyndaǵy azamattar merzimdi áskerı shaqyrý komıssııasynyń, 27 jastan bastap 45-55 jasqa deıingiler áskerge mindettilerdiń esebinde turady. Olardyń ishinde soldat-serjanttar, zapastaǵy ofıerler bar.
— Qazirgi jastardyń áskerı ómirge qyzyǵýshylyǵy qalaı?
— Buryn keńes zamanynda áskerge barmaǵan, Otan aldyndaǵy boryshyn ótemegen jigitterge jurt, onyń ishinde názik jandylar basqasha kózqaraspen qaraıtyn. Máselen, aǵa býyn ókilderiniń kóbi kezinde áskerge suranyp baratyn. Sodan soń ǵana mansap qýyp, qyzmetke ornalasatyn. Qazir zaman da, zań da ózgerdi. Sondyqtan qazirgi jastar arasynda ózderi suranyp baratyndar az. Degenmen áskerı ómirge qyzyǵýshylyq tanytatyndar barshylyq. Mysaly, qazir jastardyń 60-70 paıyzy ásker qataryna erikti túrde barady. Árıne, shaqyrý qaǵazyn alǵanymen, bizge kelýge asyqpaıtyndar da bar.
Olarǵa belgilengen merzimde shaqyrý pýnktine kelmegeni úshin mólsheri 5 aılyq eseptik kórsetkish aıyppul salynady. Al zańǵa sáıkes áskerı boryshyn óteýden túbegeıli bas tartqan azamattar Qazaqstan Respýblıkasynyń Qylmystyq Kodeksiniń 387-babyna sáıkes 1 myń aılyq eseptik kórsetkish, ıaǵnı, 3 mıllıonǵa jýyq teńge aıyppul tóleýge mindetti.
Qazir Aqtóbe oblysynda 18-27 jas aralyǵyndaǵy 20 myńnan astam adam bar. Onyń ishinde joǵary bilim alyp júrgenderdi eseptegende áskerge shaqyrylýy tıis 9 myńdaı jas bar. Mine, biz osylardyń ishinen iriktep, densaýlyǵy, psıhıkasy jaqsy, barlyq talapqa saı sarbazdardy tańdap alamyz.
Taǵy bir aıtarym, búgingi sarbaz — keshegi oqýshy. Sondyqtan Otan aldyndaǵy boryshty óteý, onyń jaýapkershiligin kóterýdi kez kelgen jasqa mektep qabyrǵasynan úıretip, túsindirý qajet. Sondaı-aq otbasynda da bul áńgime aıtylýǵa tıis. Kez kelgen er bala ósken soń Otan aldyndaǵy paryzyn adal, ójettikpen óteýi kerektigin bilýi qajet.
— Áńgimeńizge raqmet!
Suhbattasqan Danagúl BAIMUQASh.
"Adyrna" ulttyq portaly.
