بۇگىن قر تاۋەلسىزدىگىنىڭ 30 جىلدىعىنا وراي قالا اكىمى مۇرات ايتەنوۆتىڭ باستاماسىمەن شىمكەنت قالاسىنىڭ ءتورت اۋدانىندا «جاستار رەسۋرستىق ورتالىعىنىڭ» بولىمشەلەرى اشىلدى.
قاراتاۋ اۋدانىنداعى بولىمشەنىڭ اشىلۋىنا شىمكەنت قالاسىنىڭ اكىمى مۇرات ايتەنوۆ، قالالىق ءماسليحات حاتشىسى ب.نارىمبەتوۆ، قاراتاۋ اۋدانىنىڭ اكىمى ا.الىقۇلوۆ، سونىمەن بىرگە «قازاقستان جاستار كونگرەسى» زاڭدى تۇلعالار بىرلەستىگىنىڭ اتقارۋشى ديرەكتورى توقتار بولىسوۆ قاتىستى.
قالالىق جاستار رەسۋرستىق ورتالىعىنىڭ باسشىسى ەرلان ايتباەۆ اۋداندىق بولىمشەنىڭ جۇمىس بارىسىمەن تانىستىردى. جاستاردىڭ يگىلىگى ءۇشىن پايدالانۋعا بەرىلگەن ورتالىق 2 قاباتتان تۇرادى جانە ءبىر مەزەتتە 50-100 جاسقا قىزمەت كورسەتە الادى.
ورتالىق نەگىزگى 5 باعىت بويىنشا جۇمىس جاسايدى: جاستارعا قىزمەت كورسەتۋ، تالانتتى جاستاردى قولداۋ، كوۆوركينگ ورتالىعى، شاعىن كىتاپحانا، پسيحولوگيالىق كەڭەس بەرۋ. ءاربىر باعىت بويىنشا جاستار شىعارماشىلىق باستامالارىن قولداۋعا، جاس كاسىپكەرلەردى قولداۋ جانە نەسيەلەندىرۋ جولدارى، جۇمىسپەن قامتۋ، تۇرعىن ۇيگە قول جەتكىزۋ، جۇمىس ورنىن تابۋ سەكىلدى مۇمكىندىكتەرگە يە بولماق.
عيماراتتىڭ ورنالاسۋ جەرىنە دە اسا ءمان بەرىلگەن، جانىندا 2 مەكتەپ، 4 وقۋ ورتالىعى، ساياباق، اللەيا، تەاتر، مادەنيەت ءۇيى، كىتاپحانا، اۋلا كلۋبى، 50 شاقتى كوپقاباتتى ءۇي بار. مۇنىڭ ءوزى جاستارمەن جۇمىس جۇرگىزۋگە، ولاردىڭ بوس ۋاقىتىن ءتيىمدى وتكىزۋگە قولايلى بولىپ وتىر.
ورتالىقتىڭ جۇمىسىمەن تانىسىپ، جاستارمەن سۇقباتتاسقان شاھار باسشىسى ارالاۋ سوڭىندا «قازاقستان جاستار كونگرەسى» زاڭدى تۇلعالار بىرلەستىگىنىڭ اتقارۋشى ديرەكتورى توقتار بولىسوۆپەن ىنتىماقتاستىق تۋرالى مەموراندۋمعا قول قويدى.
