الاكولدىڭ پوليتسەيلەرى جەدەل ىزدەستىرۋ شارالارى بارىسىندا مال ۇرلايتىن قىلمىسكەردى اشكەرەلەدى. بۇل تۋرالى "جەتىسۋ" گازەتى مالىمدەدى.
الاكول اۋدانىنىڭ پوليتسياسىنا اقشي اۋىلىنىڭ تۇرعىنى جايىلىمنان ەكى باس ءىرى قارا مالىنىڭ قولدى بولعانىن حابارلاعان. وقيعا ورنىنا جەتكەن ءتارتىپ ساقشىلارى مال ۇرلىعىن اشۋعا باعىتتالعان شارالاردى قابىلدادى.
- اۋدان تۇرعىنىڭ ارىزى نەگىزىندە جەدەل ىزدەستىرۋ شارالارىن جۇرگىزدىك. جان-جاقتى تەكسەرۋ بارىسىندا 37 جاستاعى اۋدان تۇرعىنى قىلمىسقا قاتىسى بار دەگەن كۇدىككە ءىلىندى. بۇلتارتپاس ايعاقتار نەگىزىندە ۇستالعان ازامات قىلمىس جاساعانىن مويىندادى. ۇرلانعان مال زاڭدى يەسىنە قايتارىلدى. اتالعان دەرەك بويىنشا قر قىلمىستىق كودەكسىنىڭ 188-1 بابىنا سايكەس، سوتقا دەيىنگى تەرگەۋ امالدارى جۇرگىزىلىپ جاتىر، - دەدى الاكول اۋدانى پوليتسيا ءبولىمىنىڭ باستىعى، پوليتسيا پودپولكوۆنيگى قۋات وسپانوۆ.
ءتارتىپ ساقشىلارى ۇرىنىڭ اۋدانداعى باسقا دا قىلمىستارعا قاتىسى بارىن تەكسەرەتىن بولادى. قىلمىستىق ءىس بويىنشا ماتەريالدار جاقىن ارادا سوتقا جولدانىپ، جەڭىل ولجاعا يە بولعىسى كەلگەن ازامات زاڭ الدىندا جاۋاپ بەرەدى.
