شىمكەنت قالاسىنىڭ اكىمى مۇرات ايتەنوۆ «كومەشبۇلاق» سۋ قۇبىرىنىڭ قۇرىلىس بارىسىن تەكسەردى. بۇل قالانىڭ سولتۇستىك باتىس بولىگىندە ورنالاسقان ەلدىمەكەندەردى اۋىز سۋمەن قامتۋ ماقساتىندا سالىنىپ جاتىر. ۇزىندىعى 30 شاقىرىمنان اسادى.
اتالعان ماگيسترالدى سۋ قۇبىرىنىڭ قۇرىلىسى اياقتالسا اسار-2, دوستىق، سولتۇستىك ساياجاي، ىنتىماق، ىنتىماق-2, باتىس، قىزىلجار، يگىلىك، جاڭاتالاپ، تاۋەلسىزدىككە - 20 جىل، كوكبۇلاق تۇرعىن الاپتارى تولىققاندى ساپالى اۋىز سۋمەن قامتاماسىز ەتىلەتىن بولادى.قازىرگى ۋاقىتتى قالا تۇرعىندارىن اۋىز سۋمەن قامتۋ ماقساتىندا 14 نىساننىڭ، ياعني 3 ماگيسترالدى سۋ قۇبىرى مەن 11 ىشكى ورامدىق جۇيەلەردىڭ قۇرىلىسى قارقىندى ءجۇرىپ جاتىر. ونىڭ ىشىندە بيىل 9 ەلدىمەكەندەگى قۇرىلىس جۇمىسى اياقتالىپ، تۇران، سولتۇستىك ساياجاي، ىنتىماق-2, باتىس، جاڭاتۇرلان، اسار-2, اقتاس، جاڭاتالاپ جانە ساۋلە شاعىناۋداندارىنىڭ تۇرعىندارى ساپالى اۋىز سۋعا قول جەتكىزەدى. قالا اكىمى ءاربىر تۇرعىن الاپ پەن شاعىناۋدان تۇرعىندارىنا جاسالاتىن جۇمىستار تۋرالى اۋدان اكىمدەرى تاراپىنان تۇسىندىرمە جۇمىستارىن جۇرگىزىپ تۇرۋدىڭ ماڭىزدى ەكەنىن ايتتى.
