اۋىر جۇك كولىكتەرىنىڭ جولعا تيگىزىپ وتىرعان زيانى قانداي؟ بۇل تۋرالى ۇنەمى ايتىلىپ تا، جازىلىپ تا جاتىر. سوعان قاراماستان الى تارتىپكە باعىنار ەمەس. وسى رەتتە الماتى وبلىسىنىڭ ار وڭىرىندە جۇك كولىكتەرىندەگى مولشەردەن تىس سالماققا تەكسەرىس جۇرگىزىلدى.
الماتى وبلىستىق كولىكتى باقىلاۋ ينسپەكتسياسىنىڭ ماماندارى نۇراسىل ەرتاەۆ، بەرىك ۇيسەمباەۆ جانە "جول اكتيۆتەرى" ۇلتتىق ساپا ورتالىعى الماتى وبلىستىق فيليالىنىڭ وكىلدەرى "الماتى – قورعاس" اۆتوجولىنىڭ توڭكەرىس اۋىلىنىڭ ماڭىندا كۇرەجولدان وتكەن اۋىر جۇك كولىكتەرىن تەكسەرىپ، باقىلاۋعا الدى.
- وبلىستىق كولىكتى باقىلاۋ ينسپەكتسياسىمەن بىرلەسىپ جۇمىس جاساپ جاتىرمىز. تۇسكە دەيىنگى ۋاقىت ارالىعىندا جۇك تيەگەن 5 اۆتوكولىك تەكسەرىلدى. اۋىر جۇك كولىگىنىڭ ەكەۋى رۇقسات ەتىلگەن وستىك جۇكتەمەدەن اسىپ كەتكەندىكتەن سول جەردە حاتتاما تولتىرىلدى. سونداي-اق، اۆتوكولىكپەن تاسىمالداۋ تالاپتارى مەن ەرەجەلەرىنىڭ بۇزىلۋىنا جول بەرمەۋ بويىنشا ءتۇسىندىرۋ جۇمىستارى جۇرگىزىلدى، - دەدى ۇلتتىق ساپا ورتالىعىنىڭ جول ينجەنەرى سۇڭعات جولداس.
اۆتوجولدىڭ ساپاسى كۇن تارتىبىنەن تۇسكەن ەمەس. باق وكىلدەرى، بلوگەرلەر، حالىقتىق باقىلاۋشىلار، ءتىپتى، قوعامداعى ءاربىر ازامات جول ساپاسىنا ەلەڭ ەتپەي قويمايدى. مىسالى، ارداگەر جۋرناليست، حالىقتىق باقىلاۋشى ماۋلەتحان بارساعازىۇلى بىلاي دەيدى:
- جەتىسۋ وڭىرىنە جىل باسىنان بەرى 530 مىڭنان اسا تۋريست كەلدى، بۇل بىلتىرعىمەن سالىستىرعاندا 25 پايىزعا كوبەيگەن دەپ قۋانىشىمىزبەن ءبولىسىپ جاتىرمىز. ارينە، جاقسى. وسى سىرتتان كەلۋشىلەر دە، ءوز ەلىمىزدىڭ جولاۋشىلارى دا جولمەن قاتىنايدى. ءبارىمىز جولاۋشىمىز. جولداردىڭ جاقسى بولعانىن قالايمىز. وبلىسىمىزدا جول سالىنىپ، جىل سايىن جاقسارىپ جاتىر. الايدا اۋىر جۇك كولىكتەرى جول ساپاسىنا نۇقسان كەلتىرۋدە. بۇل باعىتتا دا قانشاما جۇمىس جاسالىپ وتىر، سوعان قاراماستان اۋىر جۇكتى تاسىمالداۋشى كولىكتىڭ يەلەرى زاڭ تالاپتارىن ورىنداماي وتىرعانى قىنجىلتادى.
