Aýyr júk kólikteriniń jolǵa tıgizip otyrǵan zııany qandaı? Bul týraly únemi aıtylyp ta, jazylyp ta jatyr. Soǵan qaramastan áli tártipke baǵynar emes. Osy rette Almaty oblysynyń ár óńirinde júk kólikterindegi mólsherden tys salmaqqa tekseris júrgizildi.
Almaty oblystyq kólikti baqylaý ınspekııasynyń mamandary Nurasyl Ertaev, Berik Úısembaev jáne "Jol aktıvteri" ulttyq sapa ortalyǵy Almaty oblystyq fılıalynyń ókilderi "Almaty – Qorǵas" avtojolynyń Tóńkeris aýylynyń mańynda kúrejoldan ótken aýyr júk kólikterin tekserip, baqylaýǵa aldy.
- Oblystyq kólikti baqylaý ınspekııasymen birlesip jumys jasap jatyrmyz. Túske deıingi ýaqyt aralyǵynda júk tıegen 5 avtokólik tekserildi. Aýyr júk kóliginiń ekeýi ruqsat etilgen ostik júktemeden asyp ketkendikten sol jerde hattama toltyryldy. Sondaı-aq, avtokólikpen tasymaldaý talaptary men erejeleriniń buzylýyna jol bermeý boıynsha túsindirý jumystary júrgizildi, - dedi ulttyq sapa ortalyǵynyń jol ınjeneri Suńǵat Joldas.
Avtojoldyń sapasy kún tártibinen túsken emes. BAQ ókilderi, blogerler, halyqtyq baqylaýshylar, tipti, qoǵamdaǵy árbir azamat jol sapasyna eleń etpeı qoımaıdy. Mysaly, ardager jýrnalıst, halyqtyq baqylaýshy Máýlethan Barsaǵazyuly bylaı deıdi:
- Jetisý óńirine jyl basynan beri 530 myńnan asa týrıst keldi, bul byltyrǵymen salystyrǵanda 25 paıyzǵa kóbeıgen dep qýanyshymyzben bólisip jatyrmyz. Árıne, jaqsy. Osy syrttan kelýshiler de, óz elimizdiń jolaýshylary da jolmen qatynaıdy. Bárimiz jolaýshymyz. Joldardyń jaqsy bolǵanyn qalaımyz. Oblysymyzda jol salynyp, jyl saıyn jaqsaryp jatyr. Alaıda aýyr júk kólikteri jol sapasyna nuqsan keltirýde. Bul baǵytta da qanshama jumys jasalyp otyr, soǵan qaramastan aýyr júkti tasymaldaýshy kóliktiń ıeleri zań talaptaryn oryndamaı otyrǵany qynjyltady.
