بەلگىلى ساياساتتانۋشى - سانجار بوقاەۆ قازاقستاندىقتاردىڭ ءال-اۋقاتى سوڭعى 10 جىلدىڭ ىشىندە قالاي وزگەرگەنىن مالىمدەپ، كەدەيلەردىڭ نە سەبەپتى جىلدان-جىلعا كەدەيلەنىپ جاتقانىنا توقتالدى، دەپ حابارلايدى "ادىرنا" ۇلتتىق پورتالىنىڭ ءتىلشىسى.
سانجار بوقاەۆ ءوز ينستاگرام پاراقشاسىندا قازاقستاندىقتارعا كەلەسىدەي مالىمدەمە جاسادى:
- 2011 جىلى ءبىزدىڭ ورتاشا جالاقىمىز - 91 مىڭ تەڭگە بولعان ەكەن. ال 10 جىلدان كەيىن 2021 جىلى 251 مىڭ بولىپتى. قازاقستاندىقتاردىڭ ورتاشا جالاقىسى 251 مىڭ تەڭگە ەكەنىنە مەن جەكە ءوز باسىم سەنبەيمىن جانە دە HeadHunter سايتىنىڭ مالىمەتى بويىنشا، سول جەردە كورسەتىلگەن ۆاكانسيالاردىڭ ورتاشا جالاقىسى - 180 مىڭ تەڭگەگە جۋىق ەكەن.
- بىراق، ءبىز ساراپشى بولعاندىقتان، تەك قانا رەسمي ستاتيستيكاعا جۇگىنگەنىمىز ءجون. سوندىقتان، وسى ستاتيستيكا بويىنشا قازاقستاندىقتاردىڭ 10 جىلدىڭ ىشىندە ورتاشا جالاقىسى 2,5 ەسەگە وسكەن. ال، نەگىزىندە ازىق-تۇلىكتى الاتىن بولساق، كولىك نەمەسە ءۇي ماسەلەسىنە كەلەتىن بولساق، ونىڭ باعاسى 2,5 ەسەگە ەمەس، 3-3,5 ەسەگە وسكەن ەكەنى ءمالىم.
بۇدان بولەك بەلگىلى ساياساتتانۋشى ءبىزدىڭ ەكونوميكامىز يمپورتتاۋ ەكونوميكاسىنا جاتاتىندىقتان دوللار كۋرسىنا وتە تاۋەلدى بولىپ تۇرعانىمىزدى، ءبىزدىڭ باعالارىمىز سوعان وتە بايلانىستى ەكەندىگىن دە اتاپ ءوتتى.
- سول ءۇشىن ءبىز ءوزىمىزدىڭ ورتاشا جالاقىمىزدى 10 جىلدىڭ ىشىندە دوللارمەن قالاي وزگەرگەنىن بايقاساق بولادى. 2011 جىلى ورتاشا جالاقىمىز $626 دوللار بولعان. ال ءدال بيىل ول $590 دوللار. دوللارمەن قارايتىن بولساق، ءبىزدىڭ جالاقىمىز تومەندەپ كەتكەن.
- ال، ەندى ءبىزدىڭ ەڭ باي، اۋقاتتى قازاقستاندىقتاردى الاتىن بولساق، ولاردىڭ تابىستارى قالاي وزگەرگەنىنە كوڭىل بولەيىك. مىنا تابليتسانى قارايتىن بولساق، 2021 جىلى ءبىزدىڭ ەڭ باي ازاماتتارىمىز ودان دا مىقتى بايلىققا قول جەتكىزگەن،- دەيدى سانجار بوقاەۆ.
ياعني، ساياساتتانۋشىنىڭ زەرتتەۋىنە سۇيەنسەك، Forbes-قا ەنگەن توپ 50 ەڭ قازاقستاننىڭ باي ازاماتتارىنىڭ جالپى سومماداعى اقشاسى 24 ملرد-تان 37 ملرد-قا دەيىن وسكەندىگىن بايقايمىز.
- شىن مانىندە، بۇل نەنى كورسەتەدى؟ بايلاردىڭ ودان سايىن بايىپ، ءبىزدىڭ كەدەيلەردىڭ ودان سايىن كەدەي بولىپ جاتقانىنا كوز جەتكىزەدى... جانە دە بۇل ءبىزدىڭ مەملەكەتتىك ساياساتتىڭ دۇرىس ەمەس ەكەنىن كورسەتتى،- دەيدى ساياساتتانۋشى.
ءسوز سوڭىندا سانجار بوقاەۆ: ء"بىز دەرەۋ ەكونوميكالىق مودەلىمىزدى وزگەرتكەنىمىز ءجون. ايتپەسە، جىلدان-جىلعا ءبىز الەۋمەتتىك ديستانتسيامىزدان ءارى ۇلكەيىپ، بايلار بايىپ، كەدەيلەر كەدەيلەنىپ كەتىپ بارا جاتقانى وتە قيىن جاعدايعا الىپ كەلەدى",- دەپ تىلگە تيەك ەتتى...
"ادىرنا" ۇلتتىق پورتالى
