قازاقستاندا ءۇشىنشى اتوم ەلەكتر ستانتسياسىن سالۋ ءۇشىن شىعىس جانە باتىس قازاقستان وڭىرلەرىندەگى بىرنەشە الاڭ قاراستىرىلىپ جاتىر، دەپ حابارلايدى “ادىرنا”.
بۇل تۋرالى اتوم ەنەرگياسى اگەنتتىگىنىڭ توراعاسى الماسادام ساتقاليەۆ ايتتى.
ونىڭ سوزىنشە، الدىن الا جۇرگىزىلگەن زەرتتەۋلەر ناتيجەسىندە شىعىس قازاقستانداعى كۋرچاتوۆ قالاسى مەن باتىس قازاقستانداعى اۋماقتار الەۋەتتى ورىن رەتىندە انىقتالعان.
«باتىس قازاقستاندا اتوم ەلەكتر ستانتسياسى رەاكتورىن پايدالانۋ بويىنشا بىرەگەي تاجىريبە بار. ال كۋرچاتوۆ – اتوم سالاسىنىڭ ماماندارى شوعىرلانعان قالا. مۇندا قاجەتتى قۇزىرەتتەردىڭ بارلىعى بار»، – دەدى اگەنتتىك باسشىسى قۇرىلتايدىڭ ەكونوميكالىق ساياسات، ونەركاسىپ جانە ەنەرگەتيكا كوميتەتىنىڭ وتىرىسىندا.
قازىرگى ۋاقىتتا قۋاتى 300-دەن 600 مەگاۆاتقا دەيىنگى ورتاشا قۋاتتى ستانتسيالاردىڭ تەحنولوگيالارى قاراستىرىلىپ جاتىر. مۇنداي نىساندار ەلەكتر ەنەرگياسىن وندىرۋمەن قاتار، جىلۋمەن جابدىقتاۋ جانە سۋدى تۇششىلاندىرۋ مۇمكىندىكتەرىنە دە يە.
ەسكە سالايىق، بيىل قىركۇيەكتە قازاقستانداعى العاشقى اەس – «بالقاش» ستانتسياسىن سالۋ تۋرالى كەلىسىمشارتقا قول قويىلدى. قۇجاتقا «قازاقستان اتوم ەلەكتر ستانتسيالارى» جشس مەن «روساتوم» مەملەكەتتىك كورپوراتسياسىنىڭ ەنشىلەس كاسىپورنى «اتومسترويەكسپورت» اق قول قويعان. العاشقى ستانتسيا الماتى وبلىسىنىڭ ۇلكەن اۋىلىندا بوي كوتەرەدى.
ەكىنشى اتوم ەلەكتر ستانتسياسىن («مويىنقۇم») جامبىل اۋدانىندا سالۋ جوسپارلانىپ وتىر. جوبا بويىنشا باس مەردىگەر رەتىندە قىتايدىڭ CNNC كومپانياسى قاراستىرىلۋدا. ءۇشىنشى اەس قۇرىلىسىنا دا وسى كومپانيا تارتىلۋى مۇمكىن. الايدا بۇل جونىندە ازىرگە رەسمي شەشىم قابىلدانعان جوق.
