قوستاناي ساپارىمىزدا قوستاناي وبلىستىق تاريحي-ولكەتانۋ مۋزەيىندە ولكەدەگى تانىمال باقسى بولعان نۇرعالي كۇزەمباەۆتىڭ نارقوبىزىن ءوز كوزىمىزبەن كورىپ، تاماشالاعان ەدىك. بۇل جادىگەردىڭ جاقسى ساقتالۋىنا ۇرپاقتارىنىڭ اتامۇرا الدىنداعى جاۋاپكەرشىلىگى سەبەپشى بولعان ەكەن.
مۋزەيدىڭ عىلىمي ادىستەمەلىك جۇمىستارمەن قامتاماسىز ەتۋ ءبولىمىنىڭ مەڭگەرۋشىسى ءنازيما قۋانىشبايقىزى ايتۋىنشا، بۇل نارقوبىز قاراعاشتان، كەي بولىكتەرى توبىلعىدان جاسالعان. الدىڭعى بولىگى تەرىمەن قاپتالعان، جوعارعى جاعىندا ورنەكتەلگەن تەمىر قاڭىلتىرى بار. ورتاسىندا - كۇرەڭ قىزىل ءتۇستى ماتا. سابىندا ەكى سۇيەكتى جاپسىرمالارى بار.
نارقوبىز اتادان بالاعا وتباسىلىق مۇرا رەتىندە ساقتالىپ كەلگەن. نارقوبىزبەن باقسىلىق قۇرعان رۋى نوعايتىلەۋ، 1890 جىلى دۇنيەگە كەلگەن نۇرعالي كۇزەمباەۆ ەدى. ول كىسىگە نارقوبىز اعاسىنان جەتكەن، اعاسى وسى نارقوبىزبەن ۇرپاقسىز ادامداردى ەمدەگەن. نارقوبىزدى 2004 جىلى مۇراجايعا نۇرعالي كۇزەمباەۆتىڭ كەلىنى، دەنيسوۆ اۋدانى شوقىباي كەنتىنىڭ تۇرعىنى جاڭىل كوشەروۆا تاپسىرعان.
ارمان اۋباكىر،
قوستاناي،
«ادىرنا» ۇلتتىق پورتالى
