Qostanaı saparymyzda Qostanaı oblystyq tarıhı-ólketaný mýzeıinde ólkedegi tanymal baqsy bolǵan Nurǵalı Kúzembaevtyń narqobyzyn óz kózimizben kórip, tamashalaǵan edik. Bul jádigerdiń jaqsy saqtalýyna urpaqtarynyń atamura aldyndaǵy jaýapkershiligi sebepshi bolǵan eken.
Mýzeıdiń ǵylymı ádistemelik jumystarmen qamtamasyz etý bóliminiń meńgerýshisi Názıma Qýanyshbaıqyzy aıtýynsha, bul narqobyz qaraǵashtan, keı bólikteri tobylǵydan jasalǵan. Aldyńǵy bóligi terimen qaptalǵan, joǵarǵy jaǵynda órnektelgen temir qańyltyry bar. Ortasynda - kúreń qyzyl tústi mata. Sabynda eki súıekti japsyrmalary bar.
Narqobyz atadan balaǵa otbasylyq mura retinde saqtalyp kelgen. Narqobyzben baqsylyq qurǵan rýy noǵaıtileý, 1890 jyly dúnıege kelgen Nurǵalı Kúzembaev edi. Ol kisige narqobyz aǵasynan jetken, aǵasy osy narqobyzben urpaqsyz adamdardy emdegen. Narqobyzdy 2004 jyly murajaıǵa Nurǵalı Kúzembaevtyń kelini, Denısov aýdany Shoqybaı kentiniń turǵyny Jańyl Kósherova tapsyrǵan.
Arman ÁÝBÁKIR,
Qostanaı,
«Adyrna» ulttyq portaly
