تۇركىستان: ءبىلىم كۇنىندە شۋ شىقتى

543

تۇركىستان وبلىسىندا اۋىل تۇرعىندارى مەكتەپ ديرەكتورى جۇمىستان كەتسىن دەپ شۋ شىعاردى، دەپ حابارلادى “ادىرنا” ۇلتتىق پورتالى كتك.تەلەارناسىنا سىلتەمە جاساپ. 

كوكارال اۋىلىندا ءۇش ايدان بەرى بەرەكە كەتكەن. ماۋسىم ايىندا وقۋشىلار ەمتيحان تاپسىرىپ جاتقاندا، مەكتەپ ديرەكتورى 9-سىنىپتا وقيتىن ەلۆيرا مىقتىبەككە قاتتى شۇيلىگىپتى. شپارگالكا قولداندىڭ دەپ، ۇزدىك وقيتىن قىزعا كوپتىڭ كوزىنشە جەكىگەن. وسىدان كەيىن وقۋشى "ۇمىتتەرىڭىزدى اقتامادىم، كەشىرىڭىزدەر" دەگەن قىسقا حات جازىپ، وزىنە قول جۇمساعان. سوندىقتان ورىمدەي قىزدى ولىمگە يتەرمەلەگەن باسشى ورنىن بوساتسىن دەپ وتىر جينالعاندار.

ال ديرەكتورعا قاتىستى قوزعالعان ءىس ساعىزشا سوزىلىپ كەتتى دەيدى مارقۇمنىڭ اكەسى.

"تەرگەۋ ءبولىمىنىڭ، وبلىستىق دەپارتامەنتتىڭ جۇمىسىنا قاناعاتتانبايمىن. 3 ايعا سوزىلىپ كەتتى. 2 ايدا بىتىرەمىز دەپ ۋادە بەرگەن. ءبىر-بىرىمەن بايلانىسى بار دەپ كۇدىكتەنەمىن. سىبايلاس. ءىىد، وبلىستىق، اۋداندىق ءبىلىم ءبولىمىنىڭ ءبىر-بىرىمەن بايلانىسى بار", - دەيدى مارقۇمنىڭ اكەسى اقىلبەك تالىپباەۆ.

قىزدىڭ ولىمىنەن سوڭ اۋىل تۇرعىندارىنىڭ كوبى مەكتەپ ديرەكتورىنا قارسى شىققان. سوندىقتان ايسارا ستاەۆا ورنىن بوساتپاسا بالالارىمىزدى مەكتەپكە جىبەرمەيمىز دەپ وتىر.

"ول ديرەكتور بولسا، وقىماسا وقىماي كەتسىن، بالامدى مەكتەپكە جىبەرمەيمىن. ونداي باسشىدان قانداي ءتالىم-تاربيە الادى؟", - دەيدى كوكارال اۋىلىنىڭ تۇرعىنى جۇلدىزاي سۇلتانوۆا.

ال، ءبىلىم كۇنىندە ديرەكتوردىڭ ءوزى ورنىندا بولماي شىقتى. ەسەسىنە جينالعان اتا-انالار الدىندا اقتالۋعا ايسارا ستاەۆانىڭ قايىن اتاسى كەلىپتى. ول كەلىنىنىڭ بۇل مەكتەپكە ديرەكتور بولعىسى كەلمەيتىنىن ايتتى. ويتكەنى اۋىل تۇرعىندارى بۇعان دەيىنگى باسشىلاردى دا سىيعىزباعان دەگەن اقساقال، كەلىنىم باسقا جۇمىس ىزدەپ جاتىر دەيدى.

"بۇعان دەيىن دە نەشە ديرەكتور كەلدى، ءبارى ارىزبەن كەتىپ جاتىر. بىرەۋى ىقتيارىمەن كەتكەن جوق. 14 جىل ديرەكتور بولدى. بۇل جەرگە قاريالاردىڭ، اۋداندىق ءبىلىم ءبولىمىنىڭ وتىنىشىمەن كەلگەن. ءوزىم دە كەلمەيمىن دەيدى", - دەپ ءتۇسىندىردى بورانباي ادىلبەكوۆ.

ديرەكتور كەلمەگەنىمەن، جينالعان جۇرتقا اۋداندىق ءبىلىم ءبولىمىنىڭ باسشىلارى دەرەۋ جەتتى. ايتۋىنشا، ديرەكتوردى وزدەرى دە تاپپاي جاتىر ەكەن. ال سىرتىنان شىعارىپ جىبەرۋ زاڭعا تومپاق بوپ تۇر دەگەن ءبولىم باسشىسى، تەرگەۋ ورگاندارىنىڭ شەشىمىن كۇتەمىز دەيدى.

"قۇزىرلى مەكەمەلەردىڭ تەكسەرىس ناتيجەسىن كۇتىپ وتىرمىز. ەگەر قورىتىندىسى قولىما تيمەسە، ول مەكتەپ ديرەكتورىنا جۇمىستان كەت دەپ دالەلسىز ايتا المايمىن. ويتكەنى زاڭ بارىمىزگە بىردەي. ال ديرەكتوردان جۇمىستان ءوز ەركىمەن كەتۋدى سۇرادىم", - دەيدى ورداباسى اۋدانى ادامي الەۋەتتى دامىتۋ ءبولىمىنىڭ باسشىسى شۇعا نۇراباەۆا.

دەمەك ديرەكتور بۇل مەكتەپكە ەندى باسشى بولمايدى. بىراق اۋىل تۇرعىندارى ايسارا ستاەۆانى ءبىلىم سالاسىنان مۇلدەم الاستاتۋدى تالاپ ەتۋدە.

پىكىرلەر
ۇقساس جاڭالىقتار