اتىراۋعا گۋمانيتارلىق جۇك ارتىپ جاتقاندا قازا بولعان ازامات بۇگىن جەرلەندى، دەپ حابارلايدى "ادىرنا" ءتىلشىسى.
تۇركىستان وبلىسىنىڭ تۇرعىنى قايىربەك الىمبەكۇلىنىڭ ارتىندا جارى مەن 7 بالاسى، مۇگەدەك ءىنىسى قالعان. ول تۋرالى جۋرناليست دياس نۇراقىن جازدى.
"13.04 كۇنى اتىراۋعا كومەككە اتتانعالى جاتقان باۋىرىمىز "حوۆو" جۇك كولىگىن ۆاگونعا ارتىپ جاتقاندا وقىستان كولىك دوڭعالاعى ۆاگوننان تايىپ كەتىپ، ءوز كولىگىنىڭ استىندا قالىپ قويىپ، 7 بالانىڭ اكەسى 37 جاستاعى قوسپانوۆ قايىربەك الىمبەكۇلى دەگەن باۋىرىمىز مارقۇم بولدى. بالا كۇنىمنەن بىرگە وسكەن ءارى كورشىم ءارى دوسىم ەدى. وتە مەيىرىمدى كىمگە كومەك قاجەت بولسا قول ۇشىن سوزۋعا اسىعىپ تۇراتىن ازامات ەدى. سوڭعى ءىس ارەكەتى دە ەلى ءۇشىن كومەككە اسىعۋ بولىپتى. كومەككە اتتانار الدىن وتە قۋانىشتى حالدە بولىپ ءجۇر ەدى، جاقسى تىلەكتەر ايتىپ شىعارىپ سالىپ ەدىك، امال نەشىك جەتە المادى", - دەلىنگەن جۋرناليستكە كەلگەن حاتتا.
ىنتالى اۋىلىنىڭ تۇرعىنى قايىربەك الىمبەكۇلىن جەرلەۋ ءراسىمى بۇگىن ءوتتى. مارقۇمنىڭ جولداسى سارا 7 بالامەن جەسىر قالعانىن ايتادى.
"بۇگىن جەرلەدىك. قولىمدا ەكى قاينىم بار. بىرەۋى ءۇشىنشى توپتاعى مۇگەدەك. بالالارىمنىڭ ۇلكەنى 16 جاستا. 10 سىنىپتا وقيدى. ال ەڭ كەنجەم 2 جاستا", - دەيدى.
قازىر جەرگىلىكتى جۋرناليستەر وتباسىنا ارنالعان قور اشىپ، قارجىلاي كومەك كورسەتۋدە.
