Túrkistan: bilim kúninde shý shyqty

542

Túrkistan oblysynda aýyl turǵyndary mektep dırektory jumystan ketsin dep shý shyǵardy, dep habarlady “Adyrna” ulttyq portaly KTK.telearnasyna silteme jasap. 

Kókaral aýylynda úsh aıdan beri bereke ketken. Maýsym aıynda oqýshylar emtıhan tapsyryp jatqanda, mektep dırektory 9-synypta oqıtyn Elvıra Myqtybekke qatty shúıligipti. Shpargalka qoldandyń dep, úzdik oqıtyn qyzǵa kóptiń kózinshe jekigen. Osydan keıin oqýshy "úmitterińizdi aqtamadym, keshirińizder" degen qysqa hat jazyp, ózine qol jumsaǵan. Sondyqtan órimdeı qyzdy ólimge ıtermelegen basshy ornyn bosatsyn dep otyr jınalǵandar.

Al dırektorǵa qatysty qozǵalǵan is saǵyzsha sozylyp ketti deıdi marqumnyń ákesi.

"Tergeý bóliminiń, oblystyq departamenttiń jumysyna qanaǵattanbaımyn. 3 aıǵa sozylyp ketti. 2 aıda bitiremiz dep ýáde bergen. Bir-birimen baılanysy bar dep kúdiktenemin. Sybaılas. IID, oblystyq, aýdandyq bilim bóliminiń bir-birimen baılanysy bar", - deıdi marqumnyń ákesi Aqylbek Tálipbaev.

Qyzdyń óliminen soń aýyl turǵyndarynyń kóbi mektep dırektoryna qarsy shyqqan. Sondyqtan Aısara Staeva ornyn bosatpasa balalarymyzdy mektepke jibermeımiz dep otyr.

"Ol dırektor bolsa, oqymasa oqymaı ketsin, balamdy mektepke jibermeımin. Ondaı basshydan qandaı tálim-tárbıe alady?", - deıdi Kókaral aýylynyń turǵyny Juldyzaı Sultanova.

Al, bilim kúninde dırektordyń ózi ornynda bolmaı shyqty. Esesine jınalǵan ata-analar aldynda aqtalýǵa Aısara Staevanyń qaıyn atasy kelipti. Ol kelininiń bul mektepke dırektor bolǵysy kelmeıtinin aıtty. Óıtkeni aýyl turǵyndary buǵan deıingi basshylardy da syıǵyzbaǵan degen aqsaqal, kelinim basqa jumys izdep jatyr deıdi.

"Buǵan deıin de neshe dırektor keldi, bári aryzben ketip jatyr. Bireýi yqtııarymen ketken joq. 14 jyl dırektor boldy. Bul jerge qarııalardyń, aýdandyq bilim bóliminiń ótinishimen kelgen. Ózim de kelmeımin deıdi", - dep túsindirdi Boranbaı Ádilbekov.

Dırektor kelmegenimen, jınalǵan jurtqa aýdandyq bilim bóliminiń basshylary dereý jetti. Aıtýynsha, dırektordy ózderi de tappaı jatyr eken. Al syrtynan shyǵaryp jiberý zańǵa tompaq bop tur degen bólim basshysy, tergeý organdarynyń sheshimin kútemiz deıdi.

"Quzyrly mekemelerdiń tekseris nátıjesin kútip otyrmyz. Eger qorytyndysy qolyma tımese, ol mektep dırektoryna jumystan ket dep dálelsiz aıta almaımyn. Óıtkeni zań bárimizge birdeı. Al dırektordan jumystan óz erkimen ketýdi suradym", - deıdi Ordabasy aýdany adamı áleýetti damytý bóliminiń basshysy Shuǵa Nurabaeva.

Demek dırektor bul mektepke endi basshy bolmaıdy. Biraq aýyl turǵyndary Aısara Staevany bilim salasynan múldem alastatýdy talap etýde.

Pikirler
Uqsas jańalyqtar