سوڭعى ۋاقىتتا شىعىس مىندەتتەمەلەرىن جابۋ ءۇشىن ۇلتتىق قوردان ترانسفەرتتەردىڭ ۇلعايۋ ءۇردىسى بايقالدى. بۇل تۋرالى مەملەكەت باسشىسى قاسىم-جومارت توقاەۆ حالىققا جولداۋىندا ايتتى، دەپ حابارلايدى "ادىرنا" ۇلتتىق پورتالى.
— ۇنەمى وسىنداي جەڭىل جولمەن ءجۇرۋ ناتيجە بەرمەيدى. قارجىلىق تۇراقتىلىق قورى شەكسىز ەمەس. البەتتە، بيۋدجەت كىرىسىن ۇلعايتۋ شارالارى قاجەت ەكەنى انىق. بىراق، ءبىرىنشى كەزەكتە، مەملەكەتتىك شىعىستاردىڭ كولەمى مەن تيىمدىلىگىن باقىلاۋ قاجەت، — دەدى توقاەۆ.
ونىڭ ايتۋىنشا، ۇلتتىق قوردىڭ اكتيۆتەرىن قالپىنا كەلتىرۋ ءۇشىن بيۋدجەت ەرەجەسىن ەنگىزۋدى جەدەلدەتۋ قاجەت. پرەزيدەنت ءتيىستى زاڭنامالىق تۇزەتۋلەردى وسى جىلدىڭ سوڭىنا دەيىن قابىلداۋدى تاپسىردى.
"جالپى، ەلىمىزگە مەملەكەتتىك قارجىنى، مەملەكەتتىك قارىزدى، بيۋدجەتتىك ساياساتتى، ۇلتتىق قوردى باسقارۋ جونىندەگى ەرەجەلەر جيىنتىعى قاجەت. ۇكىمەت پەن ۇلتتىق بانكتەن جىل سوڭىنا دەيىن مەملەكەتتىك قارجىنى باسقارۋ تۇجىرىمداماسىن دايىنداۋدى سۇرايمىن", — دەدى توقاەۆ.
"ادىرنا" ۇلتتىق پورتالى
