ايماق باسشىسى ماحامبەت دوسمۇحامبەتوۆ ارنايى بارىپ، كورگەن "دەنى ساۋدىڭ - جانى ساۋ" الەۋمەتتىك پويىزىنىڭ "ساعىز - اتىراۋ" باعىتىنداعى تاسىمالى "اتىراۋ - قۇرمانعازى" باعىتىندا دا قاتىنايتىن بولادى.
قىزىلقوعا اۋدانىنا جۇمىس ساپارى اياسىندا اتىراۋ وبلىسىنىڭ اكىمى ماحامبەت دوسمۇحامبەتوۆ ساعىز ستانساسىنان جولعا شىققان تەگىن تاسىمال پويىزىنىڭ ۆاگوندارىن كورىپ شىعىپ، جولاۋشىلارعا ءسات ساپار تىلەدى.
"بۇل - تۇرعىنداردىڭ ەكپە الۋىنا جاعداي تۋعىزۋ ماقساتىندا ۇيىمداستىرىلىپ وتىرعان باستاما، ويتكەنى ىندەتپەن كۇرەسۋدىڭ بىردەن-ءبىر جولى ۆاكتسينا الۋ" دەپ اتاپ ءوتتى اتىراۋ وبلىسىنىڭ اكىمى ماحامبەت دوسمۇحامبەتوۆ.
جولاۋشىلاردىڭ كەيبىرى ەكپەنى العاش العالى جاتسا، ەندى ءبىرى ەكپەنىڭ ەكىنشى كومپونەنتىن سالدىرماقشى.
قىزىلقوعا اۋدانىنىڭ قۇرمەتتى ازاماتى بايعالي دوسىمباەۆ ارنايى پويىز ارناپ، ەكپە الۋعا جاعداي جاساپ جاتقان وبلىس باسشىلىعىنا ريزاشىلىعىن ءبىلدىردى.
"بۇعان دەيىن قان قىسىمىم بولعان سوڭ ەكى رەت ەكپە الا الماپ ەدىم، كەيىن بالا-شاعامىزدىڭ دەنساۋلىعى ءۇشىن وتباسىمىزبەن ەكپە الدىق. بالالارىمىزعا دا ۇنەمى ايتىپ وتىرامىز. ونىڭ ۇستىنە قازىر الەۋمەتتىك جەلىلەر ارقىلى دا تەرىس تۇسىنىك قالىپتاستىرىپ، حالىقتىڭ اراسىن ەكىگە ءبولىپ قويىپ وتىرعاندار بار. جالعان اقپاراتتارعا دا توقتام بولۋى كەرەك" دەيدى بايعالي دوسىمباەۆ.
60 ورىندىق ەكى ۆاگون اۋدان تۇرعىندارى ءۇشىن ارنايى جاساقتالىپ وتىر.
"قازىرگى تاڭدا وبلىستا 59 ەكپە الۋ پۋنكتتەرى بار. ونىڭ 10-ى جىلجىمالى پۋنكتتەر. ارنايى الەۋمەتتىك پويىز جولاۋشىلارى ءۇشىن، اتىراۋ قالاسىندا ەكى ەگۋ پۋنكتى تەمىر جول اۋرۋحاناسىندا جانە N7 اتىراۋ قالالىق ەمحاناسىندا قىزمەت كورسەتەدى" دەدى اتىراۋ وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ.
تەگىن تاسىمالداۋ اكتسياسى "اتىراۋ - ساعىز" باعىتىمەن بىرگە، "اتىراۋ - قۇرمانعازى" باعىتىندا دا جالعاسادى.
جوبا اتىراۋ وبلىسى اكىمدىگىنىڭ قولداۋىمەن "قازاقستان تەمىر جولى" اق-ى باستاماسىمەن ىسكە اسۋدا.
