«تۇرعىندار ۇيلەرىنە ورالا الادى»: ساپارباەۆ جارىلىستىڭ توقتاعانىن حابارلادى

3464
Adyrna.kz Telegram

جامبىل وبلىسى بايزاق اۋدانىنداعى ورىن العان جارىلىس زارداپتارىن جويۋ، كەلتىرىلگەن شىعىنداردى انىقتاۋ، قالپىنا كەلتىرۋ جۇمىستارى جۇرگىزىلۋدە. بۇل تۋرالى وبلىس اكىمى بەردىبەك ساپارباەۆ وڭىرلىك كوممۋنيكاتسيالار قىزمەتى الاڭىندا وتكەن بريفينگ بارىسىندا ايتتى.

- مەملەكەت باسشىسىنىڭ تاپسىرماسىنا سايكەس ءبىز جەدەل شتاب قۇردىق. وعان بارلىق ءتيىستى ورگانداردىڭ وكىلدەرى ەندى. قر قورعانىس جانە توتەنشە جاعداي ءمينيستىرى، ىشكى ىستەر ءمينيسترىنىڭ ورىنباسارىمەن بىرگە تاۋلىك بويى وقيعا ورنىندا جۇمىس جاساپ جاتىرمىز. زارداپتاردى جويۋ، كەلگەن شىعىنداردى انىقتاۋ بويىنشا شارالار اتقارىلۋدا. جارىلىس بولعان جەرگە جاقىن ورنالاسقان 3 ەلدىمەكەن بار. ونىڭ ەڭ جاقىنى 1 شاقىرىم جەردە ورنالاسقان قاينار اۋىلى. قالعان ەكەۋى 5 شاقىرىم قاشىقتىقتا. وسى ەلدى مەكەندەگى ازاماتتاردىڭ بارلىعى باسقا جەرلەرگە، ياعني ءبىز دايىنداعان 10 مەكتەپ، 5 كوللەدجدىڭ جاتاقحانالارىنا ورنالاستىرىلدى. قازىرگى تاڭدا 227 ادام سوندا قالىپ وتىر دەسەك، باسىم بولىگى وزدەرىنىڭ اعايىن-تۋىستارىنا كەتتى. بولعان جاعدايلاردى قالپىنا كەلتىرۋ ءۇشىن 1000-نان استام ادام، 120-عا جۋىق تەحنيكا تارتىلدى،-دەدى ايماق باسشىسى.

سونداي-اق، 30-دان اسا جەدەل جاردەم كولىگى جۇمىلدىرىلعان. بارلىعى 88 ادامعا مەديتسينالىق كومەك كورسەتىلسە، جەڭىل جاراقات العان 60 ادام ۇيلەرىنە قايتارىلدى. قازىرگى تاڭدا №1 تاراز قالالىق اۋرۋحاناسىندا 28 ادام ەم الۋدا. ولاردىڭ 6-نىڭ جاعدايى ورتاشا اۋىر. ومىرلەرىنە ەشقانداي قاۋىپ جوق.

- بۇگىن تاڭەرتەڭ ناۋقاستارمەنەن كەزدەستىك، جاعدايلارىن سۇرادىق. ءدارى-دارمەك جونىندە ەشقانداي ماسەلە جوق. جاعدايلارى تۇراقتى. ەۆوكۋاتسيالانعان تۇرعىندارمەن دە كەزدەستىك. ولار كەرەك-جاراقپەن، ىستىق تاماقپەن قامتىلۋدا. قازىر جارىلىس توقتادى. تۇرعىندار ۇيلەرىنە ورالا الادى،-دەدى ب. ساپارباەۆ.

ايماق باسشىسى كەشە تەمىرجول قوزعالىسى توقتاعاندىعىن، تاراز قالاسىندا قالعان ەكى جولاۋشىلار پويىزىنىڭ جولاۋشىلارى ءۇشىن 20 شاقتى اۆتوكولىك ۇيىمداستىرىلىپ، ءتيىستى باعىتتارى بويىنشا جونەلتىلگەنىن جەتكىزدى.

- قازىر ساپيورلار جۇمىس ىستەپ جاتىر. تەمىرجولدىڭ بارلىعى تازارتىلعان سوڭ، قايتا تەكسەرىلىپ، شەشىم قابىلداناتىن بولادى. ال جالپى كولىكتەرگە بايلانىستى قازىر اينالما جول ۇيىمداستىرىلعان. جالپى جاعداي تۇراقتى، باقىلاۋدا. مەملەكەت باسشىسىنىڭ تاپسىرماسىنا سايكەس، بارلىق زارداپ شەككەن ازاماتتارعا كومەك كورسەتىلەدى. زاڭعا سايكەس قايتىس بولعان ازاماتتاردىڭ وتباسىلارىنا مەملەكەتتەن كومەك بەرىلەدى. زارداپ شەككەن ازاماتتاردىڭ اراسىندا مۇمكىندىگى شەكتەۋلى ت.ب ازاماتتار بولسا، زاڭعا سايكەس كومەك كورسەتىلەدى. زارداپ شەككەن ۇيلەر مەن نىساندارعا كەلەتىن بولساق، ماماندار 3 ەلدىمەكەندى ارالاپ شىقتى. وندا ورتەنگەن ۇيلەر، باسقا دا نىساندار تىركەلمەگەن. تەك قانا شاتىرلار، تەرەزەلەر، ەسىكتەر عانا زاقىمدانعان. ءبىز ارنايى كوميسسيا قۇردىق. قازىر ولار زەردەلەۋ جۇمىستارىن جۇرگىزۋدە. بارلىق ءۇيدى، نىساندى زەردەلەيمىز. زاڭعا سايكەس شەشىم قابىلدايتىن بولامىز،-دەدى وبلىس اكىمى.

«ادىرنا» ۇلتتىق پورتالى

پىكىرلەر