Jambyl oblysy Baızaq aýdanyndaǵy oryn alǵan jarylys zardaptaryn joıý, keltirilgen shyǵyndardy anyqtaý, qalpyna keltirý jumystary júrgizilýde. Bul týraly oblys ákimi Berdibek Saparbaev óńirlik kommýnıkaııalar qyzmeti alańynda ótken brıfıng barysynda aıtty.
- Memleket basshysynyń tapsyrmasyna sáıkes biz jedel shtab qurdyq. Oǵan barlyq tıisti organdardyń ókilderi endi. QR Qorǵanys jáne Tótenshe jaǵdaı mınıstiri, Ishki ister mınıstriniń orynbasarymen birge táýlik boıy oqıǵa ornynda jumys jasap jatyrmyz. Zardaptardy joıý, kelgen shyǵyndardy anyqtaý boıynsha sharalar atqarylýda. Jarylys bolǵan jerge jaqyn ornalasqan 3 eldimeken bar. Onyń eń jaqyny 1 shaqyrym jerde ornalasqan Qaınar aýyly. Qalǵan ekeýi 5 shaqyrym qashyqtyqta. Osy eldi mekendegi azamattardyń barlyǵy basqa jerlerge, ıaǵnı biz daıyndaǵan 10 mektep, 5 kolledjdiń jataqhanalaryna ornalastyryldy. Qazirgi tańda 227 adam sonda qalyp otyr desek, basym bóligi ózderiniń aǵaıyn-týystaryna ketti. Bolǵan jaǵdaılardy qalpyna keltirý úshin 1000-nan astam adam, 120-ǵa jýyq tehnıka tartyldy,-dedi aımaq basshysy.
Sondaı-aq, 30-dan asa jedel járdem kóligi jumyldyrylǵan. Barlyǵy 88 adamǵa medıınalyq kómek kórsetilse, jeńil jaraqat alǵan 60 adam úılerine qaıtaryldy. Qazirgi tańda №1 Taraz qalalyq aýrýhanasynda 28 adam em alýda. Olardyń 6-nyń jaǵdaıy ortasha aýyr. Ómirlerine eshqandaı qaýip joq.
- Búgin tańerteń naýqastarmenen kezdestik, jaǵdaılaryn suradyq. Dári-dármek jóninde eshqandaı másele joq. Jaǵdaılary turaqty. Evokýaııalanǵan turǵyndarmen de kezdestik. Olar kerek-jaraqpen, ystyq tamaqpen qamtylýda. Qazir jarylys toqtady. Turǵyndar úılerine orala alady,-dedi B. Saparbaev.
Aımaq basshysy keshe temirjol qozǵalysy toqtaǵandyǵyn, Taraz qalasynda qalǵan eki jolaýshylar poıyzynyń jolaýshylary úshin 20 shaqty avtokólik uıymdastyrylyp, tıisti baǵyttary boıynsha jóneltilgenin jetkizdi.
- Qazir sapıorlar jumys istep jatyr. Temirjoldyń barlyǵy tazartylǵan soń, qaıta tekserilip, sheshim qabyldanatyn bolady. Al jalpy kólikterge baılanysty qazir aınalma jol uıymdastyrylǵan. Jalpy jaǵdaı turaqty, baqylaýda. Memleket basshysynyń tapsyrmasyna sáıkes, barlyq zardap shekken azamattarǵa kómek kórsetiledi. Zańǵa sáıkes qaıtys bolǵan azamattardyń otbasylaryna memleketten kómek beriledi. Zardap shekken azamattardyń arasynda múmkindigi shekteýli t.b azamattar bolsa, zańǵa sáıkes kómek kórsetiledi. Zardap shekken úıler men nysandarǵa keletin bolsaq, mamandar 3 eldimekendi aralap shyqty. Onda órtengen úıler, basqa da nysandar tirkelmegen. Tek qana shatyrlar, terezeler, esikter ǵana zaqymdanǵan. Biz arnaıy komıssııa qurdyq. Qazir olar zerdeleý jumystaryn júrgizýde. Barlyq úıdi, nysandy zerdeleımiz. Zańǵa sáıkes sheshim qabyldaıtyn bolamyz,-dedi oblys ákimi.
«Adyrna» ulttyq portaly
