«ادىرنا» ۇلتتىق پورتالىنىڭ كەزەكتى سۇحباتى الماتى وبلىسى تجد باستىعى، پولكوۆنيك تويچۋبەكوۆ اسقار تاسبۋلاتۇلىمەن بولدى.
- الماتى وبلىسىنىڭ تجد قاراماعىندا قانداي جابدىقتار مەن تەحنيكالار بار، ولاردىڭ سانى قانشا؟ جەتكىلىكتى مە؟ جاڭاسىن الۋ جوسپاردا جوق پا؟
-الماتى وبلىسىنىڭ تجد قاراماعىندا نەگىزگى ءورت ءسوندىرۋ، ارنايى جانە قوسالقى اۆتوكولىكتەرىنەن تۇراتىن 249 بىرلىك تەحنيكا جانە 117 بىرلىك اۆاريالىق قۇتقارۋ قۇرالدارى بار. ۇستىمىزدەگى جىلى جەرگىلىكتى بيۋدجەت ەسەبىنەن 8 بىرلىك تەحنيكا (ونىڭ ىشىندە 5 بىرلىگى ءورت ءسوندىرۋ تەحنيكاسى، 1 بىرلىگى ۆاحتالىق اۆتوبۋس، 1 بىرلىگى وتىمدىلىگى جوعارعى اۆاريالىق-قۇتقارۋ اۆتوكولىگى) جانە 2 بىرلىك گيدراۆليكالىق قۇرال جيناعىن ساتىپ الۋ جوسپارلانىپ وتىر.
2014-2020 جىلدار كەزەڭىندە جەرگىلىكتى بيۋدجەت ەسەبىنەن 56 بىرلىك تەحنيكا جانە 107 بىرلىك اۆاريالىق-قۇتقارۋ جابدىعى ساتىپ الىندى، بۇل كولىك قۇرالدارىمەن جاراقتاندىرۋدىڭ تيەسىلىك نورماسىنىڭ 40,8%-عا (2014 جىلى بۇل كورسەتكىش 22,3% - دى قۇرادى) جانە قۇتقارۋ جابدىقتارىمەن جاراقتاندىرۋدى 44,4%-عا (2014 جىلى 10,7%) جەتكىزۋگە مۇمكىندىك بەردى.
-بۇگىندە الماتى ايماعىنىڭ قاۋىپسىزدىگىنە جاۋاپتى دەپارتامەنتتە قانشا قىزمەتكەر بار؟ قانشا ادام كۇندەلىكتى جاۋىنگەرلىك كەزەكشىلىكتە؟
-بۇگىنگى كۇنى دەپارتامەنت شتاتىندا 1 163 ادام جۇمىس ىستەيدى، ونىڭ ىشىندە جاۋىنگەرلىك كەزەكشىلىككە جۇمىلدىرىلاتىنى 896 ادام (شامامەن كىۇندەلىكتى 172-دەن، 224 ادامعا دەيىن).
-وتكەن جىلمەن سالىستىرعاندا ايماقتا تۋىنداعان ورتتەردىڭ ايىرماشىلىعى قانشالىقتى، زارداپ شەككەندەردىڭ سانى ازايدى دەۋگە كەلە مە؟ ولاردىڭ اراسىندا بالالار بار ما (سالىستىرۋ ءۇشىن سانداردى كورسەتىڭىز).
-2021 جىلدىڭ 7 ايىندا وبلىس كولەمىندە وتكەن جىلمەن سالىستىرعانداعى تۋىنداعان ورتتەردىڭ سانى 9,6%-عا ازايعان (2021 جىلى 503, 2020 جىلى 557 ءورت تىركەلگەن). ورتتەردىڭ سالدارىنان زارداپ شەككەندەردىڭ سانى 45,4%-عا (2021 جىلى – 6, 2020 جىلى - 11 ادام) ازايعانىمەن، وكىنىشكە وراي قازا بولعاندار سانى 50%-عا ارتقان (2021 جىلى – 24, 2020 جىلى - 16 ادام). ءورت كەزىندە 4 بالا زارداپ شەكتى (بالالار اراسىندا قازا بولعاندار جوق).
-پاندەميا الماتى تجد قۇتقارۋشىلارىنىڭ جۇمىسىنا قالاي اسەر ەتتى؟
-كوروناۆيرۋستىق ينفەكتسياعا بايلانىستى پاندەمياعا قاراماستان، وبلىس اۋماعىنىڭ قاۋىپسىزدىگىن قامتاماسىز ەتۋ بويىنشا جۇمىستار ىركىلىسسىز قامتاماسىز ەتىلەدى. قۇتقارۋشىلاردىڭ الدىنا قويىلعان تاپسىرمالار مەن مىندەتتەردىڭ بارلىعى تولىعىمەن ورىندالادى. جەكە قۇرامىنىڭ دەنساۋلىعىن ساقتاۋعا باعىتتالعان بارلىق ءىس-شارالار ىسكە اسىرىلۋدا.
-ءسىزدىڭ ويىڭىزشا، قۇتقارۋشى قانداي قاسيەتتەرگە يە بولۋى كەرەك؟ جاستار ءورت ءسوندىرۋ جانە قۇتقارۋ بولىمشەلەرىنە قوسىلۋعا دايىن با؟ بۇل ماماندىققا سۇرانىس قانشالىقتى؟
-قۇتقارۋشىلار ەڭ الدىمەن وتانسۇيگىشتىك، باتىلدىق، پاراساتتىلىق جانە جانقيارلىق قاسيەتتەرگە يە بولۋى كەرەك. قۇتقارۋشى ماماندىعىنا قىزىعۋشىلىق جاستار اراسىندا جىلدان جىلعا ارتۋدا. اتاپ ايتساق قر تجم تاراپىنان الماتى وبلىسىنا مالىك عابدۋللين اتىنداعى ازاماتتىق قورعاۋ اكادەمياسىنا 2021 جىلى وقۋعا تۇسۋگە بولىنگەن 11 ورىنعا 184 (2020 جىلمەن سالىستىرعاندا 2 ەسەگە ارتىق، 91 ۇمىتكەر) ۇمىتكەردەن وقۋعا قابىلداۋ تۋرالى ءوتىنىش كەلىپ ءتۇستى. سونىمەن قاتار جىل باسىنان 83 ادامنان ءورت ءسوندىرۋ جانە قۇتقارۋ بولىمشەلەرىنە جۇمىسقا ورنالاسۋ بويىنشا ءوتىنىش تۇسكەن. بۇگىنگى كۇنگە وفيتسەر جانە قاتارداعى جاۋىنگەر لاۋازىمدارىنا بوس ورىندار جوق.
اڭگىمەلەسكەن: دينا ليتپين،
«ادىرنا» ۇلتتىق پورتالى
