رەسەي اقش ساربازدارىن ورتالىق ازيادا كورگىسى كەلمەيدى. بۇل تۋرالى رەسەيدىڭ سىرتقى ىستەر ءمينيسترى سەرگەي لاۆروۆ مالىمدەدى، دەپ حابارلايدى «ادىرنا» ءتىلشىسى ريا نوۆوستيگە سىلتەمە جاساپ.
"Wall Street Journal رەسەي امەريكالىق ساربازداردى ورتالىق ازيادا كورگىسى كەلە مە دەپ سۇرادى. جوق. بىرىنشىدەن، بىزدە ورتاق قاۋىپسىزدىك كەڭىستىگى بار جانە بۇل كەڭىستىكتە ءوز مىندەتتەرىمىز بار. مەن ۇجىمدىق قاۋىپسىزدىك تۋرالى كەلىسىم ۇيىمىن مەڭزەپ وتىرمىن. ول بارلىق وداقتاستاردىڭ ءوز اۋماعىندا شەتەلدىك قارۋلى كۇشتەردىڭ قوزعالىسىنا قاتىستى ماسەلەلەر بويىنشا كەلىسىمىن قامتاماسىز ەتەدى»،— دەدى لاۆروۆ ءباسپاسوز ءماسليحاتىندا.
ونىڭ ايتۋىنشا، امەريكالىقتار قاجەت بولعان جاعدايدا اۋعانستان اۋماعىنا سوققى بەرە الۋى ءۇشىن بۇل ەلدەن شىعىپ، ينفراقۇرىلىمى مەن قارۋ -جاراقتارىنىڭ ءبىر بولىگىن، سونداي-اق اسكەري قىزمەتكەرلەرىن كورشى مەملەكەتتەردىڭ اۋماعىنا ورنالاستىرۋدى كوزدەگەن.
«امەريكالىقتاردىڭ ءوز باستامالارىن قاناعاتتاندىرۋى ءۇشىن قانداي دا ءبىر ەل وسىنداي نىساناعا اينالۋعا مۇددەلى ەكەنىنە كۇمانمەن قارايمىن»،- دەپ ءسوزىن تولىقتىردى مينيستر.
ايتا كەتەيىك، بۇعان دەيىن "تاليبان" قوزعالىسىنىڭ سودىرلارى اقش ازاماتتارى اۋعانستاننان 31 تامىزعا دەيىن كەتۋى كەرەك دەپ مالىمدەگەن ەدى.
«ادىرنا» ۇلتتىق پورتالى
