Reseı AQSh sarbazdaryn Ortalyq Azııada kórgisi kelmeıdi. Bul týraly Reseıdiń Syrtqy ister mınıstri Sergeı Lavrov málimdedi, dep habarlaıdy «Adyrna» tilshisi RIA Novostıge silteme jasap.
"Wall Street Journal Reseı amerıkalyq sarbazdardy Ortalyq Azııada kórgisi kele me dep surady. Joq. Birinshiden, bizde ortaq qaýipsizdik keńistigi bar jáne bul keńistikte óz mindetterimiz bar. Men ujymdyq qaýipsizdik týraly kelisim uıymyn meńzep otyrmyn. Ol barlyq odaqtastardyń óz aýmaǵynda sheteldik qarýly kúshterdiń qozǵalysyna qatysty máseleler boıynsha kelisimin qamtamasyz etedi»,— dedi Lavrov baspasóz máslıhatynda.
Onyń aıtýynsha, amerıkalyqtar qajet bolǵan jaǵdaıda Aýǵanstan aýmaǵyna soqqy bere alýy úshin bul elden shyǵyp, ınfraqurylymy men qarý -jaraqtarynyń bir bóligin, sondaı-aq áskerı qyzmetkerlerin kórshi memleketterdiń aýmaǵyna ornalastyrýdy kózdegen.
«Amerıkalyqtardyń óz bastamalaryn qanaǵattandyrýy úshin qandaı da bir el osyndaı nysanaǵa aınalýǵa múddeli ekenine kúmánmen qaraımyn»,- dep sózin tolyqtyrdy mınıstr.
Aıta keteıik, buǵan deıin "Talıban" qozǵalysynyń sodyrlary AQSh azamattary Aýǵanstannan 31 tamyzǵa deıin ketýi kerek dep málimdegen edi.
«Adyrna» ulttyq portaly
