جاپونيا مەن وڭتۇستىك كورەيانىڭ بانكتەرى يراننىڭ 500 ميلليون دوللارىن بۇعاتتاپ تاستادى. يراننىڭ اتالعان 500 ميلليون دوللارى رەسەيدەن العان قارىزى بولىپ شىقتى. بۇل قاراجاتقا رەسەي يراندا «بۋشەر-2» اەس-ءنىڭ قۇرىلىس جۇمىستارىن جۇرگىزگەن بولاتىن.
قازىر يران رەسەي الدىنداعى قارىزىن تولەي الماي وتىر. بۇل جايىندا يراننىڭ رەسەيدەگى توتەنشە جانە وكىلەتتى ەلشىسى لەۆان جاگاريان مالىمدەمە جاسادى. يراننىڭ جاپونيا مەن وڭتۇستىك كورەياداعى مەملەكەتتىك اكتيۆتەرىنىڭ بۇعاتتالۋىنا اقش-تىڭ ەكونوميكالىق سانكتسيالارى سەبەپ بولعان. قازىر سانكتسيانىڭ سوققىسىنان تەگەران ەشقانداي شارالارعا بارا الماي وتىر. يران يسلام مەملەكەتى 1970 جىلدان باستاپ اقش-تىڭ سانكتسياسىندا وتىر. 2000 جىلدان باستاپ سانكتسيانىڭ كۇشى ءتىپتى ارتتى.
رەسەي مەن يران 1995 جىلى «بۋشەر-2» اەس-ءنى سالۋ بويىنشا كەلىسىم شارت جاساسقان بولاتىن. كەلىسىم شارت اياسىندا رەسەيلىك مەردىگەر كومپانيا «زارۋبەجاتومەنەرگوستروي» يراندا اەس-ءتىڭ قۇرىلىس جۇمىستارىنا كىرىسىپ، ءبىرىنشى بلوگىن اياقتاعان. اقش-تىڭ قاتاڭ سانكتسياسىنىڭ سالدارىنان يرانداعى «بۋشەر-2» اەس-ءنىڭ جۇمىسىنا زيىن كەلىپ، توقتاپ قالعان. قازىر رەسەي تاراپى يرانداعى «بۋشەر-2» اەس-ءنىڭ جۇمىسىن جانداندىرۋ ماقساتىندا رەكاتورلارعا يادرولىق جانار-جاعار ماي ونىمدەرىن جەتكىزىپ بەرۋدە.
ال، ەكونوميكالىق ساراپشىلار رەسەيدىڭ يرانداعى اەس-ءتىڭ قۇرىلىس جۇمىستارىنا جۇمساعان 500 ميلليون دوللارى كەرى قايتپايدى دەپ جورامالداۋدا. رەسەيلىك بيلىك وكىلدەرى يراننىڭ 500 ميلليون دوللار قارىزىن كەشىرىپ جىبەرۋگە دە دايىن ەكەنىن ايتتى.
بەكبولات قارجان،
«ادىرنا» ۇلتتىق پورتالى
