يران سىرتقى ىستەر مينيسترلىگىنىڭ رەسمي وكىلى يسمايل باگاي يراننىڭ ديپلوماتيالىق وكىلدىكتەرى سامارقاندتىڭ مادەني مۇراسىنا قاتىستى جاريالانىمدار جاساعاننان كەيىن وزبەكستانمەن ارادا تۋىنداعان كەلىسپەۋشىلىككە پىكىر ءبىلدىردى، دەپ حابارلايدى «ادىرنا» ءتىلشىسى.
باگايدىڭ ايتۋىنشا، ەكى ەلدىڭ قارىم-قاتىناسى ۇزاق تاريحقا يە، ال حالىقتار اراسىنداعى مادەني بايلانىستار الداعى ىنتىماقتاستىقتىڭ ماڭىزدى نەگىزى بولىپ قالا بەرەدى.
ء«بىز وزبەكستانمەن قارىم-قاتىناسقا ۇلكەن ءمان بەرەمىز»، – دەدى يران سىرتقى ىستەر مينيسترلىگىنىڭ وكىلى.
سونداي-اق باگاي يراننىڭ كەيبىر ەلشىلىگى قىزمەتكەرلەرىنىڭ جاريالانىمدارى اقش تاراپىنا باعىتتالعانىن ءتۇسىندىردى.
ايتا كەتەيىك، 23 قازاندا وزبەكستان سىرتقى ىستەر مينيسترلىگى يران ەلشىسى مۇحامماد ءالي ەسكانداريدى شاقىرىپ، وعان نارازىلىق نوتاسىن تابىستاعان. بۇعان يراننىڭ ارمەنيا مەن زيمبابۆەدەگى ديپلوماتيالىق وكىلدىكتەرى جاريالاعان جازبالار سەبەپ بولعان.
X الەۋمەتتىك جەلىسىندە يراننىڭ ديپلوماتيالىق وكىلدىكتەرى اقش مەملەكەتتىك حاتشىسى ماركو رۋبيونىڭ سامارقاندتاعى رەگيستان الاڭى اياسىندا تۇسىرىلگەن ۆيدەوسىن قايتا جاريالاعان. جازبالارداعى تۇسىندىرمەلەردە تاريحي عيماراتتاردىڭ ساۋلەتى «پارسى-يسلام وركەنيەتىنە» ءتان ەرەكشەلىك رەتىندە سيپاتتالعان.
تاشكەنت مۇنداي ءتۇسىندىرۋدى سامارقاند تاريحىنا بىرجاقتى ءارى ساياسيلاندىرىلعان كوزقاراس دەپ باعالاعان. وزبەكستان سىرتقى ىستەر مينيسترلىگى سامارقاند، بۇحارا، حيۋا جانە باسقا دا تاريحي قالالاردىڭ مادەني جانە ساۋلەت مۇراسى كوپتەگەن عاسىر بويى قالىپتاسقانىن، سونداي-اق وزبەك مەملەكەتتىلىگىنىڭ تاريحى مەن ۇلتتىق مادەني داستۇرلەرىن بەينەلەيتىنىن اتاپ وتكەن.
وزبەكستان يران تاراپىن داۋلى جازبالاردى الەۋمەتتىك جەلىلەردەن الىپ تاستاۋعا جانە بولاشاقتا وسىنداي جاعدايلاردىڭ قايتالانۋىنا جول بەرمەۋ ءۇشىن شارالار قابىلداۋعا شاقىرعان.
سونىمەن قاتار سىرتقى ىستەر مينيسترلىگى وزبەكستاننىڭ ءوزارا قۇرمەت پەن سەنىمگە نەگىزدەلگەن يرانمەن تاتۋ كورشىلىك قارىم-قاتىناستى ساقتاۋعا مۇددەلى ەكەنىن مالىمدەگەن. الايدا تاشكەنت تاريحي جانە مادەني مۇرا ماسەلەلەرىندە ءوز ۇستانىمىن قورعاۋدى جالعاستىرماق.
