Euronews ارناسىنا بەرگەن سۇحباتىندا بۇۇ-داعى يراننىڭ تۇراقتى وكىلى ءالي باحرەيني قازىرگى تاياۋ شىعىستاعى شيەلەنىستى توقتاتۋدىڭ جالعىز جولى - ءيزرايلدىڭ اسكەري قيمىلدارىن دوعارۋ ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ەگەر يزرايل شابۋىلدارىن توقتاتسا، ديپلوماتياعا ءۇمىت بار. الايدا، اقش قاقتىعىسقا ارالاسقان جاعدايدا، يران وعان قارسى كۇش قولداناتىنىن ەسكەرتتى.
"ەۋروپالىقتار ىستەي الاتىن ارەكەت - ءيزرايلدى ايقىن ايىپتاپ، وعان قولداۋ كورسەتۋدى دوعارۋ", - دەدى باحرەيني.
ول ەۋروپانىڭ يزرايل اگرەسسياسىنا كوز جۇمۋى مەن يراننىڭ يادرولىق كەلىسىمىن ساقتاپ قالۋدا قاۋقارسىزدىق تانىتۋى قازىرگى اسكەري شيەلەنىستىڭ ۋشىعۋىنا سەبەپ بولعانىن ايتتى.
ء"يزرايلدىڭ ەش جازاعا تارتىلماۋى - ەۋروپا، اقش جانە بۇۇ قاۋىپسىزدىك كەڭەسىنىڭ ارەكەتسىزدىگىنىڭ ناتيجەسى", - دەپ مالىمدەدى ول.
باحرەينيدىڭ ايتۋىنشا، ەۋروپا يزرايلگە كورسەتىلىپ جاتقان اسكەري، قارجىلىق جانە بارلاۋ كومەگىن توقتاتۋى ءتيىس. سونىمەن قاتار، يراننىڭ يادرولىق باعدارلاماسىنا قاتىستى شىنايى ۇستانىم ءبىلدىرۋى كەرەك.
بۇل ماسەلەلەر 21 ماۋسىم كۇنى جەنەۆادا وتەتىن كەلىسسوزدەردە فرانتسيا، گەرمانيا جانە ۇلىبريتانيانىڭ سىرتقى ىستەر مينيسترلەرىنە جەتكىزىلەدى. جيىندا يراننىڭ يادرولىق باعدارلاماسى تالقىلانباق.
يران بۇعان دەيىن يادرولىق باعدارلاماسى بويىنشا بىرلەسكەن جان-جاقتى ءىس-قيمىل جوسپارىنا (JCPOA) قاتىسقان. بۇل كەلىسىم اياسىندا ەلدىڭ يادرولىق قىزمەتىنە شەكتەۋ قويىلىپ، سانكتسيالار جەڭىلدەتىلگەن ەدى. الايدا 2018 جىلى دونالد ترامپ بۇل كەلىسىمدى اقش اتىنان بۇزىپ، جاڭا سانكتسيالار ەنگىزدى. وسىدان كەيىن تەگەران ۋران بايىتۋدى قايتا جالعاستىردى.
قازىر يران ۋراندى 60%-عا دەيىن بايىتىپ جاتىر، بۇل اسكەري ماقساتتاعى 90%-دان تومەن بولعانىمەن، JCPOA رۇقسات بەرگەن 3,67%-دان بىرنەشە ەسە جوعارى. يران يادرولىق باعدارلاماسىنىڭ تەك بەيبىت، ازاماتتىق ماقساتتى كوزدەيتىنىن ايتادى. ال يزرايل، كەرىسىنشە، يران يادرولىق قارۋ جاساپ جاتىر دەپ ەسەپتەيدى.
سۇحباتتا باحرەيني اقش-تىڭ قاقتىعىسقا ارالاسۋى جاعدايىندا يراننىڭ جاۋاپسىز قالمايتىنىن اشىق ايتتى.
"قارۋلى كۇشتەرىمىز جاعدايدى باقىلاۋدا ۇستاپ وتىر. اقش-تىڭ ارەكەتىن باعالاپ، قاجەت بولسا سوققى بەرۋگە دايىن", - دەدى ول.
ءالي باحرەينيدىڭ ايتۋىنشا، ءدال قازىرگى جاعدايدا قانداي دا ءبىر ديپلوماتيالىق باستاما تۋرالى ايتۋعا بولمايدى.
ء"بىزدىڭ حالقىمىز بەن ەلىمىز ءۇشىن باستى مىندەت - اگرەسسيانى توقتاتۋ. اگرەسسورلاردى توقتاتۋدان باسقا ەشتەڭە تۋرالى ويلاۋعا دا، ايتۋعا دا بولمايدى", - دەپ قورىتىندىلادى ول.
