بيىل تۇڭعىش رەت نۇر-سۇلتان قالاسىنىڭ سپورتشى تالاپكەرلەرىنە قالا اكىمىنىڭ ءبىلىم گرانتتارى بەرىلەدى. كونكۋرستىق كومميسيا قورىتىندىسى بويىنشا جوعارى ءبىلىمدى مامانداردى دايىنداۋعا مەملەكەتتىك ءبىلىم بەرۋ تاپسىرىسىن ەۋرازيا ۇلتتىق ۋنيۆەرسيتەتى جۇزەگە اسىرادى، دەپ حابارلايدى «ادىرنا» ءتىلشىسى ەلوردا اكىمدىگىنىڭ رەسمي سايتىنا سىلتەمە جاساپ.
«نەبىر مىقتى سپورتشىلار، ەل نامىسىن حالىقارالىق ارەنالاردا قورعاپ جۇرگەن سپورت شەبەرلەرى مەكتەپ كەزدەرىنەن جاتتىعۋ زالىندا ءجۇرىپ، وقۋ ءبىتىرىپ تەستىلەۋدەن وتكەندە ءبىرازى اقساپ جاتادى. مەملەكەتتىك گرانتقا ىلىنبەگەن سپورتشىلار قولجەتىمدى ماماندىقتارعا تاپسىرۋعا ءماجبۇر بولادى. سونىڭ سالدارىنان ءبىز مىقتى ماماندار شىعادى دەگەن سپورتشىلارىمىزدان ايىرىلىپ قالىپ جاتامىز. مەملەكەت باسشىسى جاستاردىڭ سپورتتىق الەۋەتىن دامىتۋعا ەرەكشە كوڭىل ءبولىپ وتىر، تيىسىنشە جان-جاقتى قولداۋ كورسەتىلۋدە. قالا اكىمى التاي سەيدىرۇلىنا جاسالعان ۇسىنىسىمىز قولداۋ تاۋىپ، نۇر-سۇلتان قالاسىنىڭ سپورتشىلارىنا 50 قالا اكىمىنىڭ گرانتىن بەرۋ تۋرالى شەشىم قابىلدادى. جوعارى وقۋ ورىندارىن اياقتاعان سوڭ، ماماندار جاتتىقتىرۋشى، نۇسقاۋشىلار رەتىندە قالالىق سپورت ۇيىمدارىنا جۇمىسقا قابىلدانادى. سولاي ءبىز ءوز كادرلارىمىزدى دايىندايمىز»، — دەدى نۇر-سۇلتان قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «دەنە شىنىقتىرۋ جانە سپورت» ماماندىعى بويىنشا قالا اكىمىنىڭ گرانتىنا وتىنىشتەردى قابىلداۋ تامىز ايىنىڭ 20-نا دەيىن جالعاسادى.
تالاپكەر سپورتشىلار تاپسىرۋى ءتيىس قۇجاتتار ءتىزىمى:
تولقۇجات (نوتاريالدى راستالعان كوشىرمەسى);
سپورتتىق دارەجەسى 1 رازرياد، ءسشۇ، سش (نوتاريالدى راستالعان كوشىرمەسى);
رەسپۋبليكالىق جانە حالىقارالىق جارىستاردىڭ ديپلومدارى مەن ماداقتاما قاعازدارى (نوتاريالدى راستالعان كوشىرمەسى);
ۇبت سەرتيفيكاتى;
شىعارماشىلىق ەمتيحاندار حاتتاماسىنىڭ شەشىمى.
جوعارىدا اتالعان قۇجاتتاردى تاپالكەرلەر ەۇۋ-دىڭ قابىلداۋ بولىمىنە (ق.مۇڭايتپاسوۆ 13) اپارىپ تاپسىرادى. قۇجاتتاردى قابىلداۋ اياقتالعان سوڭ كونكۋرستىق كومميسيا قۇرىلىپ، اكىم گرانتىنىڭ يەگەرلەرى بەلگىلى بولادى.
قوسىمشا سۇراقتار ەۇۋ-دىڭ قابىلداۋ بولىمىنە 55-68-57, 55-68-55, 55-68-53, 55-68-73, سونداي-اق دەنە شىنىقتىرۋ جانە سپورت باسقارماسىنا 557567, 557561 حابارلاسىپ بىلۋگە بولادى.
«ادىرنا» ۇلتتىق پورتالى
