Bıyl tuńǵysh ret Nur-Sultan qalasynyń sportshy talapkerlerine qala ákiminiń bilim granttary beriledi. Konkýrstyq kommısııa qorytyndysy boıynsha joǵary bilimdi mamandardy daıyndaýǵa memlekettik bilim berý tapsyrysyn Eýrazııa ulttyq ýnıversıteti júzege asyrady, dep habarlaıdy «Adyrna» tilshisi elorda ákimdiginiń resmı saıtyna silteme jasap.
«Nebir myqty sportshylar, el namysyn halyqaralyq arenalarda qorǵap júrgen sport sheberleri mektep kezderinen jattyǵý zalynda júrip, oqý bitirip testileýden ótkende birazy aqsap jatady. Memlekettik grantqa ilinbegen sportshylar qoljetimdi mamandyqtarǵa tapsyrýǵa májbúr bolady. Sonyń saldarynan biz myqty mamandar shyǵady degen sportshylarymyzdan aıyrylyp qalyp jatamyz. Memleket basshysy jastardyń sporttyq áleýetin damytýǵa erekshe kóńil bólip otyr, tıisinshe jan-jaqty qoldaý kórsetilýde. Qala ákimi Altaı Seıdirulyna jasalǵan usynysymyz qoldaý taýyp, Nur-Sultan qalasynyń sportshylaryna 50 qala ákiminiń grantyn berý týraly sheshim qabyldady. Joǵary oqý oryndaryn aıaqtaǵan soń, mamandar jattyqtyrýshy, nusqaýshylar retinde qalalyq sport uıymdaryna jumysqa qabyldanady. Solaı biz óz kadrlarymyzdy daıyndaımyz», — dedi Nur-Sultan qalasynyń Dene shynyqtyrý jáne sport basqarmasynyń basshysy Samat Erǵalıev.
L.N.Gýmılev atyndaǵy Eýrazııa Ulttyq Ýnıversıtetiniń «Dene shynyqtyrý jáne sport» mamandyǵy boıynsha qala ákiminiń grantyna ótinishterdi qabyldaý tamyz aıynyń 20-na deıin jalǵasady.
Talapker sportshylar tapsyrýy tıis qujattar tizimi:
Tólqujat (notarıaldy rastalǵan kóshirmesi);
Sporttyq dárejesi 1 razrıad, SShÚ, SSh (notarıaldy rastalǵan kóshirmesi);
Respýblıkalyq jáne Halyqaralyq jarystardyń dıplomdary men madaqtama qaǵazdary (notarıaldy rastalǵan kóshirmesi);
UBT sertıfıkaty;
Shyǵarmashylyq emtıhandar hattamasynyń sheshimi.
Joǵaryda atalǵan qujattardy tapalkerler EUÝ-dyń qabyldaý bólimine (Q.Muńaıtpasov 13) aparyp tapsyrady. Qujattardy qabyldaý aıaqtalǵan soń konkýrstyq kommısııa qurylyp, ákim grantynyń ıegerleri belgili bolady.
Qosymsha suraqtar EUÝ-dyń qabyldaý bólimine 55-68-57, 55-68-55, 55-68-53, 55-68-73, sondaı-aq Dene shynyqtyrý jáne sport basqarmasyna 557567, 557561 habarlasyp bilýge bolady.
«Adyrna» ulttyq portaly
