اقتوبە وبلىسىندا بيىلعى جىلدىڭ ءى جارتىجىلدىعىندا 17 مىڭ جاڭا جۇمىس ورنى اشىلعان دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتوبە وبلىسىنىڭ اكىمى وڭداسىن ورازالين دەپۋتاتتارعا ءوڭىردىڭ وتكەن جارتى جىل ىشىندەگى الەۋمەتتىك-ەكونوميكالىق دامۋىنىڭ قورىتىندىسىن تانىستىرىپ، وبلىستا جىل باسىنان بەرى ەكونوميكالىق ءوسىمنىڭ كەزەڭ-كەزەڭمەن قالپىنا كەلتىرىلىپ جاتقانىن اتاپ ءوتتى.
بارلىق نەگىزگى الەۋمەتتىك-ەكونوميكالىق كورسەتكىشتەر بويىنشا وڭ ديناميكا قامتاماسىز ەتىلگەن، ءوڭىردىڭ ەكونوميكالىق ءوسىمىنىڭ قىسقا مەرزىمدى قارقىنى شامامەن 105,5% قۇرايدى، بيىلعى جىلدىڭ ماۋسىم ايىنداعى ينفلياتسياسى ورتاشا رەسپۋبليكالىق دەڭگەيدەن تومەن– 104,4% (رەسپۋبليكادا – 104,6%).
ەسەپتىك كەزەڭدە 17 مىڭنان اسا جۇمىس ورنى قۇرىلدى، وبلىستاعى ورتاشا ايلىق ەڭبەكاقى 204,7 مىڭ تەڭگەگە جەتىپ، 18,6%-عا، ال ناقتى ەڭبەكاقى – 110,1% ءوستى.ونەركاسىپ ءوندىرىسىنىڭ جالپى كولەمى 108,2% نەمەسە 997,2 ملرد تەڭگەنى قۇرادى. اۋىل شارۋاشىلىعىنىڭ بىلتىرمەن سالىستىرعاندا 2,6%-عا وسكەنى بايقالادى.
ءوڭىر باسشىسى سونداي-اق، وسى جىلعا وبلىستىق، اۋداندىق، جەرگىلىكتى ماڭىزى بار 451 شاقىرىم جولدى جوندەۋ، 28 سۋمەن جابدىقتاۋ جوسباسىن جۇزەگە اسىرۋ جانە 14 ەلدى مەكەنگە گاز قوسۋ جوسپارلانعانىن ايتتى.
ازاماتتاردىڭ ءومىر ءسۇرۋ دەڭگەيىن ودان ءارى جاقسارتۋ ماقساتىندا سەسسيا بارىسىندا قالا ماڭىنداعى ەلدى مەكەندەردى ينجەنەرلىك ينفراقۇرىلىممەن (سۋمەن، گازبەن، ەلەكترمەن جانە ت.ب.) قامتاماسىز ەتۋ ءۇشىن قوسىمشا قاراجات ءبولۋ تۋرالى ۇسىنىس قارالدى. ءوڭىر باسشىسى بۇل باستامانى ءبىراۋىزدان قولداعان دەپۋتاتتارعا العىسىن ءبىلدىردى.
اعىمداعى جىلدىڭ قاڭتار-ماۋسىم ايلارىنىڭ قورىتىندىسى بويىنشا 367 مىڭ شارشى مەتر تۇرعىن ءۇي پايدالانۋعا بەرىلدى. جىل سوڭىنا دەيىن بۇل كورسەتكىشتى 1,1 ميلليون شارشى مەتر تۇرعىن ۇيگە جەتكىزۋ جوسپارلانىپ وتىر.
— ەكىنشى جارتىجىلدىقتا ءبىزدىڭ نازار الەۋمەتتىك ماڭىزى بار ازىق -تۇلىك تاۋارلارىنىڭ باعاسىن ۇستاپ تۇرۋ شارالارىن جۇزەگە اسىرۋعا، ينۆەستيتسيالاردىڭ كەلۋىن ۇلعايتۋعا، وڭدەۋ سەكتورىنىڭ ءوسۋى مەن دامۋى ەسەبىنەن ەكونوميكا قۇرىلىمىن ودان ءارى ارتاراپتاندىرۋعا باعىتتالاتىن بولادى. ءبىز حالىقتى ۆاكتسيناتسيالاۋدىڭ جوعارى قارقىنىن ساقتاۋعا جانە ەپيدەمياعا قارسى شارالاردى جالعاستىرۋعا بەت الدىق. مەملەكەت باسشىسىنىڭ اقتوبەلىكتەردىڭ ءومىر ءسۇرۋ ساپاسى مەن ءال-اۋقاتىن جاقسارتۋ جونىندەگى تاپسىرماسىن تەك بيلىك قانا ەمەس، سونىمەن بىرگە قوعام دا بىرلەسىپ كۇش سالا الادى. تەك وسى جاعدايدا عانا ءبىز وبلىستىڭ الەۋمەتتىك-ەكونوميكالىق دامۋىن جاقسارتىپ، وبلىس تۇرعىندارىنىڭ جايلى ءومىر ءسۇرۋىن قامتاماسىز ەتە الامىز،- دەدى وڭداسىن ورازالين.
"ادىرنا" ۇلتتىق پورتالى.
