شىمكەنت قالاسىنىڭ اكىمى مۇرات ايتەنوۆ قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، «Nur Otan» پارتياسىنىڭ فراكتسيا مۇشەلەرى بەرىك بەكجانوۆتى، مۇحتار ەرماندى جانە عاني تاشقاراەۆتى قابىلدادى.پارلامەنت ءماجىلىسىنىڭ دەپۋتاتتارى سەسسيا ارالىق كەزەڭدە سايلاۋشىلارمەن كەزدەسۋلەر وتكىزىپ، پارتيانىڭ سايلاۋالدى باعدارلاماسىن ىسكە اسىرۋعا ارنالعان جول كارتاسىنىڭ ورىندالۋىن قاداعالايدى.
قازاقستان رەسپۋبليكاسى پارلامەنتى ءماجىلىسىنىڭ VII شاقىرىلىمداعى I سەسسيا بارىسىندا پارلامەنت ءماجىلىسىنىڭ دەپۋتاتتارى 100-دەن اسا زاڭ جوبالارىن قاراپ، 63 زاڭ جوباسى مەملەكەت باسشىسىنا قول قويۋعا ۇسىنىلعان. حالىقپەن تىكەلەي وتەتىن كەزدەسۋلەردىڭ بەلگىلەنگەن فورماتى ەلدەگى ەپيداحۋالعا بايلانىستى بۇل جولى وزگەرىپ وتىر. باسىمدىق قۇرىلىس الاڭدارىندا، ەڭبەك ۇجىمدارىندا، وزەكتى ماسەلەلەر ساناتىنداعى وبەكتىلەردە شاعىن عانا توپتارمەن وتەتىن كەزدەسۋلەرگە بەرىلمەك. «Nur Otan» پارتياسىنىڭ شىمكەنت قالالىق فيليالى دا پارتيانىڭ سايلاۋالدى باعدارلاماسىنىڭ نەگىزىندە قالانىڭ دامۋىنا ىقپال ەتەتىن ماسەلەلەر بويىنشا جول كارتاسى قابىلدانعانىن، ولاردى تابىستى ىسكە اسىرۋعا مەملەكەت قارجىسىنىڭ بولىنۋىنە پارلامەنت دەپۋتاتتارى قولداۋ كورسەتىپ وتىرعانىن جەتكىزدى. قالا باسشىسى ءوز سوزىندە پارتيا فيليالىنىڭ ناقتى ءىس-قيمىلىن ايقىندايتىن بۇل قۇجات قالانىڭ تۇتاستاي دامۋىنا سەرپىن بەرەتىنىن ايتا وتىرىپ، العا قويعان ماقساتتاردىڭ ورىندالۋىنا قوعامدىق باقىلاۋ جۇرگىزۋگە پارتيا مۇشەلەرى بەلسەندى تۇردە قاتىسۋى كەرەك، دەدى.
