شىمكەنتتە شاحماتتان جاسوسپىرىمدەر اراسىنداعى قازاقستان رەسپۋبليكاسى چەمپيوناتىنىڭ جەڭىمپازدارى انىقتالدى. 8-18 جاس ارالىعىنداعى جاسوسپىرىمدەردىڭ زياتكەرلىك سايىسىنا كىل ۇزدىكتەر قاتىستى.شاحمات ويىندارى بويىنشا جاسوسپىرىمدەر اراسىنداعى ەل بىرىنشىلىگى شىمكەنت قالاسىنىڭ اكىمى مۇرات ايتەنوۆتىڭ باستاماسىمەن، بارلىق قاۋىپسىزدىك شارالارىن ساقتاي وتىرىپ، جاۋاپكەرشىلىكپەن جۇزەگە اسىرىلدى. قالا اكىمى مۇرات ايتەنوۆ ۇزدىك شىققان جاس شاحماتشىلاردى ارنايى قابىلداپ، قارجىلاي جۇلدەمەن ماراپاتتادى.
ەل تاۋەلسىزدىگىنىڭ 30 جىلدىعى اياسىندا قالامىزدا جاسوسپىرىمدەر اراسىندا رەسپۋبليكالىق دەڭگەيدەگى شاحمات ءتۋرنيرى ءبىرىنشى رەت وتكىزىلدى. وسى ونكۇندىكتە بالالار مول تاجىربيە جيناپ، جاڭا ورتا قالىپتاستىردى دەپ ويلايمىن. شىمكەنت قالاسىندا شاحماتتىڭ قارقىندى دامۋىنا بارلىق مۇمكىندىكتەر بار. قالا مەكتەپتەرىندە شاحمات ارنايى ءپان رەتىندە ەنگىزىلدى. وقۋشىلار اراسىندا شاحمات ءتۋرنيرى ءۇشىنشى مارتە وتكىزىلىپ وتىر. سىزدەردىڭ تالاپتارىڭىزدىڭ ارقاسىندا كوپتەگەن جاستارىمىز جىگەرلەنەدى. الداعى ۋاقىتتا الەم بىرىنشىلىكتەرىندە ۇزدىك بولاتىندارىڭىزعا سەنەمىن، - دەدى مۇرات دۇيسەنبەكۇلى قۇتتىقتاۋ سوزىندە.قازاقستان شاحمات فەدەراتسياسىنىڭ اتقارۋشى ديرەكتورى انۋار يسماعامبەتوۆ كۇردەلى كەزەڭدە اسا جوعارى جاۋاپكەرشىلىكپەن ەل بىرىنشىلىگىنىڭ وتۋىنە قولداۋ كورسەتكەنى ءۇشىن قالا اكىمىنە العىسىن ءبىلدىردى. بۇل تۋرنيردە جاسوسپىرىمدەر اراسىندا ۇزدىك ويىنشىلار قاتىسقاندىعىن، شىمكەنت قالاسىندا كوپتەگەن تالانتتى جاستار ءوسىپ جاتقاندىعىن ايتا وتىرىپ، قالانىڭ قازاقستاننىڭ شاحمات استاناسى اتانۋى كوپتەن كۇتكەن ماسەلە ەكەندىگىن جەتكىزدى.كەزدەسۋ بارىسىندا الداعى ۋاقىتتا قالادا شاحمات كلۋبتارىنىڭ جەلىسىن قالىپتاستىرۋ، وسى ويىن تۇرىنەن ءتۇرلى دەڭگەيدەگى سايىستار وتكىزۋ جوسپارلانىپ وتىرعاندىعى ايتىلدى. ايتا كەتسەك، چەمپيوناتتا شىمكەنت قالاسىنان زەينەپ سۇلتانبەك (18 جاسقا دەيىنگى قىزدار اراسىندا), اياۋلىم قالداروۆا (14 جاسقا دەيىنگى قىزدار اراسىندا) I ورىندى جەڭىپ الدى.ىرىكتەۋ سىنىنان سۇرىنبەي وتكەن جاسوسپىرىمدەر ەندى ەلىمىزدىڭ نامىسىن الەم جانە ازيا چەمپيوناتىندا قورعايتىن بولادى.
