شىمكەنت قالاسىنا ارنايى جۇمىس ساپارىمەن قر دەنساۋلىق ساقتاۋ ءمينيسترى الەكسەي تسوي كەلدى. دەنساۋلىق ساقتاۋ ءمينيسترى قالاداعى حالىقارالىق ستاندارتتارعا ساي جەدەل مەديتسينالىق جاردەم كورسەتۋ ستانتسياسىنىڭ Call ورتالىعىنىڭ جۇمىسىمەن تانىستى. ورتالىقتا ءبىر اۋىسىمدا 30 ديسپەتچەر جۇمىس ىستەيدى.
«ەپيدەميالوگيالىق جاعدايدىڭ ورشۋىنە بايلانىستى قازىر جەدەل جاردەم قىزمەتىنە كۇنىنە 5000-عا جۋىق قوڭىراۋ كەلىپ تۇسۋدە» - دەيدى ورتالىقتىڭ باس دارىگەرى گ. قۇرمانبەكوۆا.
سوعان قاراماستان جەدەل جاردەم قىزمەتكەرلەرى كۇشەيتىلگەن ريجيمدە جۇمىس ىستەپ، ناۋقاستارعا مەديتسينالىق كومەكتى دەر كەزىندە كورسەتىپ جاتىر. ورتالىقتىڭ جاي-كۇيمەن تانىسقان مينيستر ا.تسوي پاندەميامەن كۇرەستە الدىڭعى شەپتە جۇمىس ىستەپ جۇرگەن جەدەل جاردەم قىزمەتكەرلەرىنىڭ ەڭبەگىن جوعارى باعالاپ، ءوز العىسىن ءبىلدىردى. سونداي-اق قر دەنساۋلىق ساقتاۋ ءمينيسترى الەكسەي تسوي قىزمەتتىك ساپارى بارىسىندا №3 قالالىق ەمحانانىڭ جۇمىسىمەن تانىستى. ا.تسوي الدىمەن ەمدەۋ مەكەمەسىندەگى ەكپە ەگۋ كابينەتتتەرىن تەكسەرىپ، ۆاكتسيناتسيالاۋ جۇمىستارىنىڭ بارىسىن كوردى. №3 قالالىق ەمحانادا العاشقىلاردىڭ ءبىرى بولىپ ەكپە ەگۋ كابينەتى اشىلعان ەدى. مۇندا كۇنىنە 500-دەن اسا ادامعا كوروناۆيرۋسقا قارسى ۆاكتسينا سالىنادى. سونداي-اق، مينيستر ەمحانا جانىنان قۇرالعان ءموبيلدى بريگادالار جۇمىسىمەن دە تانىستى. ءموبيلدى توپ قىزمەتكەرلەرى ەمحانادا تىركەلگەن ناۋقاستارعا ءۇي جاعدايىندا امبۋلاتوريالىق مەديتسينالىق كومەك كورسەتەدى. ەمحانانىڭ باس دارىگەرىمەن سۇقباتتاسقان الەكسەي تسوي ناۋقاستارعا كورسەتىلەتىن قىزمەتتەر ەمحانا دەڭگەيىندە كۇشەيتىلسە، اۋرۋحاناعا تۇسەتىن پاتسيەنتتەر سانىن ازايتۋعا بولاتىنىن ايتىپ، ءموبيلدى بريگادالار سانىن كوبەيتۋدى تاپسىردى.
