وتباسى-ىنتىماقتىڭ، ىزگىلىكتىڭ، ماحابباتتىڭ، جىلۋلىقتىڭ، تازالىقتىڭ وتانى. وتباسىنىڭ نەگىزگى ۇيىتقىسى، التىن دىڭگەگى– اكە مەن انا. دىڭگەگى مىقتى وتباسى عانا ادامزاتتىڭ اسا قاجەتتى، ءارى قاسيەتتى التىن مەكتەبى بولماق. بۇل مەكتەپتىڭ ادامزات ۇرپاعىنا دەگەن ىقپالى مەن اسەر كۇشىن ومىردەگى باسقا نارسەنىڭ كۇشىمەن سالىستىرۋعا بولمايدى. «ەل بولام دەسەڭ، بەسىگىڭدى تۇزە» – دەگەن ناقىل ءسوز وتباسى تاربيەسىنىڭ ماڭىزىن ناقتىلاپ تۇرعانداي. اتا-انانىڭ بالاعا دەگەن رياسىز ماحابباتىنىڭ ءوزى نەگە تۇرادى دەسەڭىزشى؟! الايدا، وسى شەكسىز بەرىلگەن «ماحابباتتىڭ» ءوزى بالاسىن تۋرا جولدان تايدىرىپ، جارعا جىعىپ جاتقاندىعى ومىردەن كورىنىس تابۋدا. ول تۋرالى كورىپ تە ءجۇرمىز، ەستىپ تە ءجۇرمىز. ەسىرتكىگە ەلىرىپ، ءومىرىن وكسىكپەن وتكىزگەن جانداردىڭ ءومىرى وكشەلەي باسىپ كەلە جاتقان ءجاسوسپىرىم بالالارعا ساباق بولارى ءسوزسىز.
قوعامدى جاسايتىن ادام دەپ الساق، ادام قانداي بولماق كەرەك؟ دەنساۋلىعى مىقتى، الەۋەتى جوعارى ادام عانا وزىنە جايلى قوعامدى جاسايدى. ولاردىڭ مۇراتى ء–تانى مەن جانى ساۋ ادامداردىڭ ىنتىماعىنا نەگىزدەلگەن قوعامدا ءومىر ءسۇرۋ. سالاۋاتتى ومىر سۇرۋ دەگەنىمىز نە دەيتىن بولساق، ول–الەۋمەتتىك ءومىردى جاقسارتۋ، بوس ۋاقىتتى تيىمدى پايدالانۋ، دەنساۋلىقتى ساقتاۋ جانە نىعايتۋ. ال زياندى ارەكەتتەر دەگەنىمىز، قازىرگى تاڭدا ەتەك العان، زامانىمىزدىڭ كەسەلدى دەرتتەرى – شىلىم شەگۋ، ماسكۇنەمدىك، ناشاقورلىق. الايدا، اتا-بابانىڭ مۇراتىن جۇزەگە اسىراتىن كەيبىر جاستار ناشاقوردىڭ سوڭىنان ەرىپ بارادى. ول– ايقىن جول ەمەس، تۇماندى جول. «اداسقاننىڭ ايىبى جوق، قايتىپ ءۇيىرىن تاپقان سوڭ»–دەپ، دانا حالقىمىز ايتقانداي، ءوز قاتەسىن تۇزەتىپ، ورتامىزعا ورالسا، ولاردىڭ كەۋدەسىنەن ەشكىم يتەرمەسى انىق.
ءار وتباسىنىڭ وزىندىك ادەت-عۇرپى، سالت-ساناسى بار. رۋحاني قۇندىلىعى باي وتباسىنان قوعامعا قاجەت تۇلعالار قالىپتاسادى. «مەن قارنىمنىڭ اشقانىنان قورىقپايمىن، قادىرىمنىڭ قاشقانىنان قورقامىن» دەگەن ءسوزدىڭ توركىنىن تۇسىندىرمەسەمدە بولادى. وتباسىمىزدا قادىرىمىزدى قاشىرماي، ءوز ورنىمىزدى بىلسەك، ءبىز تاربيەلەگەن بالالار كەلەشەكتىڭ تۇتقاسى بولارى انىق. ءبىزدى اقشامىزبەن، نە بولماسا داۋلەتىمىزبەن باعالامايدى، ءبىزدى وسىرگەن بالامىزدىڭ تاربيەسىمەن باعالايدى. سوندىقتان بالامىزدىڭ تاعدىرىن سول جاقتاعى جۇرەگىمىزبەن ويلايىق، ول ءار كەز وڭ شەشىمىن بەرەدى.
ە.ەسقوجا
