Otbasy-yntymaqtyń, izgiliktiń, mahabbattyń, jylýlyqtyń, tazalyqtyń Otany. Otbasynyń negizgi uıytqysy, altyn dińgegi– áke men ana. Dińgegi myqty otbasy ǵana adamzattyń asa qajetti, ári qasıetti altyn mektebi bolmaq. Bul mekteptiń adamzat urpaǵyna degen yqpaly men áser kúshin ómirdegi basqa nárseniń kúshimen salystyrýǵa bolmaıdy. «El bolam deseń, besigińdi túze» – degen naqyl sóz otbasy tárbıesiniń mańyzyn naqtylap turǵandaı. Ata-ananyń balaǵa degen rııasyz mahabbatynyń ózi nege turady deseńizshi?! Alaıda, osy sheksiz berilgen «mahabbattyń» ózi balasyn týra joldan taıdyryp, jarǵa jyǵyp jatqandyǵy ómirden kórinis tabýda. Ol týraly kórip te júrmiz, estip te júrmiz. Esirtkige elirip, ómirin óksikpen ótkizgen jandardyń ómiri óksheleı basyp kele jatqan jasóspirim balalarǵa sabaq bolary sózsiz.
Qoǵamdy jasaıtyn adam dep alsaq, adam qandaı bolmaq kerek? Densaýlyǵy myqty, áleýeti joǵary adam ǵana ózine jaıly qoǵamdy jasaıdy. Olardyń muraty –táni men jany saý adamdardyń yntymaǵyna negizdelgen qoǵamda ómir súrý. Salaýatty ómir súrý degenimiz ne deıtin bolsaq, ol–áleýmettik ómirdi jaqsartý, bos ýaqytty tıimdi paıdalaný, densaýlyqty saqtaý jáne nyǵaıtý. Al zııandy áreketter degenimiz, qazirgi tańda etek alǵan, zamanymyzdyń keseldi dertteri – shylym shegý, maskúnemdik, nashaqorlyq. Alaıda, ata-babanyń muratyn júzege asyratyn keıbir jastar nashaqordyń sońynan erip barady. Ol– aıqyn jol emes, tumandy jol. «Adasqannyń aıyby joq, qaıtyp úıirin tapqan soń»–dep, dana halqymyz aıtqandaı, óz qatesin túzetip, ortamyzǵa oralsa, olardyń keýdesinen eshkim ıtermesi anyq.
Ár otbasynyń ózindik ádet-ǵurpy, salt-sanasy bar. Rýhanı qundylyǵy baı otbasynan qoǵamǵa qajet tulǵalar qalyptasady. «Men qarnymnyń ashqanynan qoryqpaımyn, qadirimniń qashqanynan qorqamyn» degen sózdiń tórkinin túsindirmesemde bolady. Otbasymyzda qadirimizdi qashyrmaı, óz ornymyzdy bilsek, biz tárbıelegen balalar keleshektiń tutqasy bolary anyq. Bizdi aqshamyzben, ne bolmasa dáýletimizben baǵalamaıdy, bizdi ósirgen balamyzdyń tárbıesimen baǵalaıdy. Sondyqtan balamyzdyń taǵdyryn sol jaqtaǵy júregimizben oılaıyq, ol ár kez oń sheshimin beredi.
E.Esqoja
