اۋعانستانداعى ۇزاققا سوزىلعان داعدارىستىڭ سالدارىنان جىل باسىنان بەرى 270 مىڭنان استام ادام ءۇيىن تاستاپ كەتۋگە ءماجبۇر بولدى. بۇل تۋرالى Euronews بۇۇ مالىمەتتەرىنە سىلتەمە جاساپ حابارلادى.
بۇۇ بوسقىندار جونىندەگى اگەنتتىگىنىڭ حابارلاۋىنشا، مەملەكەت اۋىر گۋمانيتارلىق داعدارىستىڭ الدىندا تۇر. ول كوپتەگەن بالاعا كەرى اسەرىن تيگىزىپ جاتىر. سوڭعى ەكى ايدىڭ ىشىندە ەلدەگى زورلىق-زومبىلىق دەڭگەيىنىڭ وسۋىنە بايلانىستى ولاردىڭ 80 مىڭنان استامى ۇيلەرىنەن ايرىلعان. قۇربان بولعانداردىڭ جارتىسىنا جۋىعى ايەلدەر مەن بالالار.
داعدارىس بۇل ەلدىڭ تۇرعىندارىمەن قاتار ەۋروپاعا دا اۋىر زارداپتار اكەلۋدە. سوعىستان قاشۋعا ءماجبۇر بولعان اۋعانستاننىڭ كوپتەگەن ازاماتتى ەۋروپا ەلدەرىنەن پانا ىزدەپ ءجۇر.
ايتا كەتەيىك، گەرمانيا كانتسلەرى انگەلا مەركەل شىلدەدە مەملەكەتتىڭ بارلىق ماسەلەنى شەشۋگە رەسۋرسى جوق ەكەنىن جانە بوسقىنداردى قابىلداي المايتىندىعىن مالىمدەدى. تۇركيا بيلىگى دە كوشى-قوننىڭ ءوسۋى تۋرالى حابارلادى. وتكەن ايدا بۇل ەل اۋعانستاننان كەلگەن 27 مىڭنان استام ادامدى يران شەكاراسىندا ۇستاعان بولاتىن.
«ادىرنا» ۇلتتىق پورتالى
