بارشامىزعا ءمالىم، بيىل «الاش» اۆتونومياسى مەن «الاش» پارتياسىنىڭ قۇرىلعانىنا 100 جىل تولۋىنا ارنالعان مەرەيتويلىق ءىس-شارالار وتكىزىلىپ جاتىر. استانادا، الماتىدا، ەلىمىزدىڭ باسقا دا وڭىرلەرىندە حالىقارالىق، رەسپۋبليكالىق دەڭگەيدەگى عىلىمي-تاجىريبەلىك كونفەرەنتسيالار بولىپ ءوتتى.
كەزىندە الاش قالاسى اتانعان سەمەيدە ءاليحان بوكەيحانعا ەڭسەلى ەسكەرتكىش ورناتىلدى، استانادا الاش كوسەمىنىڭ ەسىمى ۇلكەن داڭعىلداردىڭ بىرىنە بەرىلدى، باتىس قازاقستاندا الاش مۇراجايى اشىلدى. قورىتا ايتقاندا، الاش مۇراسىن، ونىڭ ارىستارىن ۇلىقتاۋدا قوعامدىق ۇيىمدار مەن مەملەكەتتىك ورگاندار ۇيىمداسا وتىرىپ ءبىرشاما شارالار اتقارۋدا.
بىراق الاشتىڭ ماڭىزدىلىعى بيىلعى ءجۇز جىلدىقتى اتاپ وتۋمەن عانا شەكتەلمەيدى. الاشتىڭ ءمانى مەن قۇدىرەتى – ۇلتتىڭ رۋحى مەن ەلىمىزدىڭ قانىنا سىڭگەن تەمىرقازىقتاي بيىك تە بەرىك ۇعىم.
جاقىندا استانادا وتكەن «رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنتسياسىنىڭ قاتىسۋشىلارىنا جولداعان قۇتتىقتاۋىندا ەلباسى الاش ۇلت-ازاتتىق قوزعالىسىنىڭ سيپاتىنا: «الاش قوزعالىسىنىڭ حح عاسىردىڭ باسىنداعى قازاق حالقىنىڭ ساياسي-الەۋمەتتىك قۇقىقتارىن قورعاۋ، ۇلتتىق بەت-بەينەسىن ساقتاپ قالۋ جولىنداعى كۇرەسى، ازاتتىق ءۇشىن كۇرەستىڭ جارقىن بەتى بولىپ تابىلادى» دەپ باعا بەردى. ەندەشە، الاش جولىن ەلىمىزدە دە، حالىقارالىق دەڭگەيدە دە زەردەلەي ءتۇسۋدىڭ، الاش يدەيالارىن، اسىرەسە، جاس ۇرپاققا تاراتۋدىڭ ماڭىزى زور.
ونىڭ ۇستىنە الاشتىڭ تۋىنىڭ استىنا تەك ساياساتكەرلەر عانا ەمەس، كوزى اشىق، كوكىرەگى وياۋ تالانتتى، دارىندى، كوكجيەگى كەڭ ازاماتتار باس قوسقاننان كەيىن، الاشتىڭ اسەرى تەك ساياساتقا عانا ەمەس، سونىمەن قاتار بىلىمگە، اعارتۋشىلىققا، مادەنيەتكە، ادەبيەتكە زور ىقپال ەتتى.
قازاقستاننىڭ ازاتتىعى جولىنا بار ءومىرىن ارناپ، سانالى تۇردە قۇرباندىققا بارعان الاش ارىستارىنىڭ ماڭگى وشپەس ىستەرىنىڭ قۇندىلىعى،ءجۇز جىلدا ءبىر اتالىپ وتەتىن شارا بولىپ قالماۋى كەرەك. كەلەسى جىلى قازاق پوەزياسىنىڭ حاس شەبەرى ماعجان جۇماباەۆتىڭ تۋعانىنا 125 جىل تولادى.
ەل تاريحىنداعى تىعىرىققا تىرەلگەن تۇستا ايتىلعان اقيىق اقىن ماعجاننىڭ جىرلارىنىڭ جاڭعىرىعى ءبىزدىڭ زامانعا جەتىپ، ەگەمەن ەلىمىزدىڭ ەركىن ويلى جاستارىن ەلشىلدىككە، پاتريوتتىققا شاقىرىپ تۇر ەمەس پە؟!
ءبىز بۇگىن، اقىننىڭ ءوز سوزىمەن ايتساق، «ارىستانداي ايباتتى»، «جولبارىستاي قايراتتى»، «قىرانداي كۇشتى» جاستارعا سەنگەن ءبىرتۋار تۇلعا ماعجان سەنىمىنىڭ اماناتىن اقتاۋىمىز ءۇشىن بيىلعى الاشتىڭ 100 جىلدىق مەرەيتويى كەلەسى جىلى ماعجان وقۋلارىمەن جالعاسىن تاپسا دەيمىز. ماعجان وقۋلارى الداعى جىلى بۇكىل رەسپۋبليكا اۋماعىندا وتكىزىلىپ، ال ونىڭ قورىتىندىسى ماعجان جۇماباەۆتىڭ تۋعان ولكەسى قىزىلجاردا جاسالعانى ءجون. ال بولاشاقتا ماعجان وقۋلارى، اتاۋلى كۇندەردە عانا ەمەس، جىل سايىن تۇراقتى وتكىزىلىپ تۇرسا نۇر ۇستىنە نۇر بولار ەدى.
بەرىك دۇيسەنبيەۆ،
قر پارلامەنتى
ءماجىلىسىنىڭ دەپۋتاتى
