Barshamyzǵa málim, bıyl «Alash» avtonomııasy men «Alash» partııasynyń qurylǵanyna 100 jyl tolýyna arnalǵan mereıtoılyq is-sharalar ótkizilip jatyr. Astanada, Almatyda, elimizdiń basqa da óńirlerinde halyqaralyq, respýblıkalyq deńgeıdegi ǵylymı-tájirıbelik konferenııalar bolyp ótti.
Kezinde Alash qalasy atanǵan Semeıde Álıhan Bókeıhanǵa eńseli eskertkish ornatyldy, Astanada Alash kóseminiń esimi úlken dańǵyldardyń birine berildi, Batys Qazaqstanda Alash murajaıy ashyldy. Qoryta aıtqanda, Alash murasyn, onyń arystaryn ulyqtaýda qoǵamdyq uıymdar men memlekettik organdar uıymdasa otyryp birshama sharalar atqarýda.
Biraq Alashtyń mańyzdylyǵy bıylǵy júz jyldyqty atap ótýmen ǵana shektelmeıdi. Alashtyń máni men qudireti – ulttyń rýhy men elimizdiń qanyna sińgen temirqazyqtaı bıik te berik uǵym.
Jaqynda Astanada ótken «Rýhanı jańǵyrý: Alash jáne azattyq ıdeıasynyń sabaqtastyǵy» atty halyqaralyq ǵylymı-tájirıbelik konferenııasynyń qatysýshylaryna joldaǵan quttyqtaýynda Elbasy Alash ult-azattyq qozǵalysynyń sıpatyna: «Alash qozǵalysynyń HH ǵasyrdyń basyndaǵy qazaq halqynyń saıası-áleýmettik quqyqtaryn qorǵaý, ulttyq bet-beınesin saqtap qalý jolyndaǵy kúresi, azattyq úshin kúrestiń jarqyn beti bolyp tabylady» dep baǵa berdi. Endeshe, Alash jolyn elimizde de, halyqaralyq deńgeıde de zerdeleı túsýdiń, Alash ıdeıalaryn, ásirese, jas urpaqqa taratýdyń mańyzy zor.
Onyń ústine Alashtyń týynyń astyna tek saıasatkerler ǵana emes, kózi ashyq, kókiregi oıaý talantty, daryndy, kókjıegi keń azamattar bas qosqannan keıin, Alashtyń áseri tek saıasatqa ǵana emes, sonymen qatar bilimge, aǵartýshylyqqa, mádenıetke, ádebıetke zor yqpal etti.
Qazaqstannyń Azattyǵy jolyna bar ómirin arnap, sanaly túrde qurbandyqqa barǵan Alash arystarynyń máńgi óshpes isteriniń qundylyǵy,júz jylda bir atalyp ótetin shara bolyp qalmaýy kerek. Kelesi jyly qazaq poezııasynyń has sheberi Maǵjan Jumabaevtyń týǵanyna 125 jyl tolady.
El tarıhyndaǵy tyǵyryqqa tirelgen tusta aıtylǵan aqıyq aqyn Maǵjannyń jyrlarynyń jańǵyryǵy bizdiń zamanǵa jetip, egemen elimizdiń erkin oıly jastaryn elshildikke, patrıottyqqa shaqyryp tur emes pe?!
Biz búgin, aqynnyń óz sózimen aıtsaq, «arystandaı aıbatty», «jolbarystaı qaıratty», «qyrandaı kúshti» jastarǵa sengen birtýar tulǵa Maǵjan seniminiń amanatyn aqtaýymyz úshin bıylǵy Alashtyń 100 jyldyq mereıtoıy kelesi jyly Maǵjan oqýlarymen jalǵasyn tapsa deımiz. Maǵjan oqýlary aldaǵy jyly búkil respýblıka aýmaǵynda ótkizilip, al onyń qorytyndysy Maǵjan Jumabaevtyń týǵan ólkesi Qyzyljarda jasalǵany jón. Al bolashaqta Maǵjan oqýlary, ataýly kúnderde ǵana emes, jyl saıyn turaqty ótkizilip tursa nur ústine nur bolar edi.
Berik DÚISENBIEV,
QR Parlamenti
Májilisiniń depýtaty
