Elimizde úsh mıllıonǵa jýyq mal qyrylyp, eki mıllıon adam tabysynan aıyrylýy múmkin. Kóńil qulazytarlyq mundaı boljamdy Qazaqstannyń mal ósirýshiler ulttyq qaýymdastyǵy jasady. Bul týraly "Eýrazııa" birinshi arnasy habarlaıdy.
Aptap ystyqtan kólder sýalyp, shóp kúıip ketti. Sharýalar men ekologtar buǵan kún raıyn ǵana emes, salǵyrttyq tanytqan sheneýnikterdi de kinálap otyr.
Mal ósirýshiler ulttyq qaýymdastyǵynyń tóraǵasy Almasbek Sadyrbaevtyń aıtýynsha, qazirdiń ózinde mal basynyń 30 proentinen aıyrylyp otyrmyz. Al úkimet bolsa jaǵdaıdy túzeý úshin eshbir shara qoldanbaǵan.
Prezıdent jem-shóp eksportyn qysqartý jóninde tapsyrma berdi. Aýyl sharýashylyǵy mınıstrligi súrlem, pishen, qara bıdaı men suly eksportyna shekteý qoıdy. Alaıda sarapshynyń aıtýynsha, fermeler bul daqyldardy paıdalanbaıdy.
"Olar fýrajdyq bıdaıdyń 4-5 klasyn, kebek pen arpany qoldanady. Al ol eksporttalyp jatyr. Bizdiń elimiz 30 jylda jem-shóp saıasaty týraly oılanyp ta kórmegen. Maldyń qyrylýy toqtamaıdy, 3 mıllıonnan astam maldan aıyrylaıyq dep otyrmyz", - deıdi Sadyrbaev.
Vedomstvodaǵylardyń bul jóninde pikiri basqa. Mal sharýashylyǵy ónimderin óndirý jáne qaıta óńdeý departamenti dırektorynyń orynbasary Qaırat Mutaevtyń aıtýynsha, bul saladaǵy jaǵdaı kúrdeli, alaıda dabyl qaǵatyndaı aýyr emes.
"Mańǵystaý oblysynda 1 159, Qyzylorda oblysynyń Aral aýdanynda 480 bas mal óldi. Alaıda mal basynyń jalpy sanyn eskersek, qyrylǵan mal 1 proentten aspaıdy", - deıdi Mutaev.
