كوروناۆيرۋس!!! ءوڭىر «قىزىل» ايماقتا. پەندەنىڭ ۇرەيىن الاتىن، جان تۇرشىگەرلىك سوزدەر ومىرىمىزگە ەنىپ كەتكەلى قاشان.
دابىل ءۇنى، دارمەنسىز ادام، دامىلسىز قىزمەت. اۋرۋحانا قابىرعاسىندا ءوتىپ جاتقان ءومىردىڭ كورىنىسى وسى. جانىنا اراشا ىزدەپ جاتقان ناۋقاستىڭ مۇڭلى كوزى، تارىققان دەم، قاۋقارسىز جاننىڭ تاعدىرى اق حالاتتىلاردىڭ كاسىبيلىگىن بارىنشا سىناپ جاتىر. قاشىپ قۇتىلاتىن جول جوق. ويتكەنى ول-ىندەت!.
سەنبەگەندەر بار-تىن. ءالى دە بار. بىراق، اقيقاتى سول «ءتاجدى تاجال» ءبىزدى تاستاپ كەتكەن جوق. جانىمىزدا، مۇرىن ۇشىندا، اياق استىندا جاتقانىن ءبىرى سەزسە، ءبىرى سەزبەيدى. ناقتىلاساق، سەزگىسى دە، سەنگىسى دە كەلمەيدى.
ال، اجالعا بەتپە-بەت كەلگەندەر ىندەتتىڭ بارىن جوققا شىعارمايدى. ولار ءبىر ولىمنەن امان قالدى. ەكى دۇنيەنىڭ ورتاسىندا شىبىن جاندارىن شىرقىراتىپ كۇرەستى. شەگىنەرگە جول جوق. ويتكەنى، وتباسى كۇتىپ تۇر.
الماتى وبلىسىندا دا ىندەت ورشۋدە. ستاتيستيكالىق دەرەكتەر جاعا ۇستاتارلىق. الدەكىمدەر، ۇكىمەتتىڭ حالىقتى شوشىتۋ ءۇشىن جاساپ وتىرعان ايلا-ءتاسىلى دەستى. اقيقاتىنا كوز جەتكىزۋ ءۇشىن، باسىمىزدى قاتەرگە تىگىپ، تاۋەكەل ەتىپ، ىندەتتىڭ شوعىرىنا كىردىك. وبلىستىق ينفەكتسيالىق اۋرۋحاناعا جاعدايدى ءوز كوزىمىزبەن كورۋ ءۇشىن باردىق.
ءبىر كوزبەن قاراعاندا، اۋلاسى تازا، اۋرۋحانا ءىشى مۇلگىگەن تىنىشتىق سياقتى. بۇل سىرت ادامنىڭ قوس جانارىنا سىيعان كورىنىس. ال، ىشكى جۇمىس مۇلدەم باسقا.
ناۋقاس جاتقان بولىمگە ارنايى قورعانىش كيىمدەرىنسىز كىرۋگە قاتاڭ تىيىم سالىنعان. اۋرۋحانا قىزمەتكەرى ءبىزدى كيىندىرىپ، قارۋسىز مايداننىڭ ورتاسىنا، جالىنداعان وتتىڭ ىشىنە جىبەردى. تاڭداۋ بىزدىكى ەدى. شىندىققا تۋرا قاراپ، ەپيداحۋالدىڭ قانشالىقتى اۋىرلىعىن سەزىنگىمىز كەلدى.
حوش، باردىق. ساۋىتىن اسىنعان ساربازداي، كيىمدى كيدىك. ءاپ ساتتە، تىنىس تارىلىپ، دەم جەتپەدى. ءبىر ءسات، كوروناۆيرۋسپەن اۋىرعاندار قايتتى ەكەن؟ دەگەن ويعا قالدىق. وتە اۋىر. سوزبەن جەتكىزۋ مۇمكىن ەمەس. جارىق ءدالىز، سانسىز ەسىكتەر، ونىڭ ارتىندا ءبىر تاعدىردىڭ يەسى ءومىر ءۇشىن كۇرەسىپ جاتىر ەدى. ءبىرازىنىڭ بەتى بەرى قاراعان.
اق حالاتتىلاردان بۇرىن ناۋقاستىڭ وزىنە، سوزىنە ءمان بەردىك. سويتتىكتە سوزگە تارتتىق.
26 شىلدە كۇنى اۋرۋ بەلگىلەرىن بەرگەن. دەنە قىزۋى 39,5 –كە دەيىن كوتەرىلگەن. ءدارىنىڭ كۇشىمەن قىزۋدى ءتۇسىرىپ وتىرعان. پەندەلىككە سالىنىپ، كوۆيدكە سەنبەگەندەردىڭ ءبىرى اقنۇر نۇربەكوۆا.
ايتۋىنشا، 2 تامىزدا جاعدايى تىم ناشارلاعان سوڭ جەدەل-جاردەم شاقىرعان. تەست تاپسىرىپ، ارتىنشا ىندەتكە شالدىققانى انىقتالعان.
«دەرت وتە اۋىر دارەجەدە ءوتتى. اۋرۋحاناعا كەلەردە وزىمە قاجەتتى كيىم-كەشەگىمدى جيناي المادىم. ەكى وكپەم قىسقاندا «ولگەن جەرىم وسى»،- دەپ ويلادىم. ەكى ۇلىم بار. سولاردى كىم قارايدى دەپ قورىقتىم. قازىر بەتىم بەرى قارادى. دەنساۋلىعىم جاقساردى. دارىگەرلەرگە راقمەت. كۇندىز-ءتۇنى قاراپ، اجالدان امان الىپ قالدى. اۋرۋعا سەنبەيتىندەرگە ايتارىم، بۇل - قالجىڭ ەمەس. قاتتى ءورشىپ جاتىر. ءوز-وزدەرىڭىزدى كۇتىڭىزدەر»،-دەيدى اقنۇر نۇربەكوۆا.
كادۋىلگى تاماق اۋرۋى سىندى باستالىپتى العاشىندا. ۆيرۋس بارلىق ادام اعزاسىن ءاپ ساتتە دەندەپ كەتەدى ەكەن. وبلىستىق اۋرۋحاناعا تۇسكەندەردىڭ باسىم كوپشىلىگى جاي عانا اتاماق اۋرۋى عوي دەپ ەلەمەگەندىكتەن ەمحانا كەرۋەتىنە تاڭىلعان. سولاردىڭ ءبىرى اسەل سابىرباەۆا.
«23 شىلدە اۋىرىپ باستادىم. جۇتقىنشاعىمدا اۋىرسىنۋ بەلگىلەرى بولدى. ءوزىم بۇرىننان «تانزيليت» بولىپ اۋىراتىندىقتان «كوۆيد» دەگەن وي بولمادى. ۇيدەگى كىشكەنتايلاردىڭ دا تاماعى ءىسىپ اۋىردى. ولار تەز جازىلدى. مەنىكى بولسا اسقىنا بەردى. كۇندە جەدەل-جاردەم شاقىرتۋمەن بولدىم. كوروناۆيرۋسقا تەست الدى. وڭ ناتيجە شىقتى. سودان اۋرۋحاناعا ءتۇستىم. تىنىسىم تارىلىپ، دەمالۋىم قيىن بولدى. العاشقى كۇندەرى وتتەگى اپپاراتىنىڭ كومەگىمەن تىنىستادىم. قازىر جاعدايىم جاقساردى. مەن ۆاكتسينا الىپ ۇلگەرمەدىم. ەگەر ەكپە سالدىرعاندا اۋىرۋ جەڭىل تۇردە وتەر ما ەدى. ءۇش ايدان سوڭ ەكپە الامىن. دەنساۋلىعىم ماڭىزدى»،-دەيدى ناۋقاس.
ءبىز تىلدەسكەن قوس بۇرىمدىنىڭ دا ايتقانى « COVID-19» بار. ەشقانداي وتىرىك ەمەس دەيدى. «ادامدارمەن تىعىز-قارىمقاتىناس جاساۋدان ساقتانۋ كەرەك، كوشەگە بەتالدى شىقپاڭىزدار، ەكپەدەن قورىقپاڭىزدار. ول كەرىسىنشە يممۋندىق جۇيەنى قالىپتاستىرادى»،- دەپ ەكى كەيىپكەردە جانۇشىرا شىندىقتارىن ايتىپ باقتى. دەن قويىپ تىڭدار حالىق بولسا، بويىنا سىڭىرەتىن سانا بولسا، ءولىم اۋزىنان قايتىپ كەلگەن ادامداردىڭ قاتەلىگىن قايتالامايدى دەپ سەنىم اراتمىز. ەسكەرتۋ! « COVID-19» - ويىنشىق ەمەس.
قازىرگى كەزدە رەسمي دەرەكتەر، الماتى وبلىسىندا وسى ۋاقىتقا دەيىن كۆي زەرتحانالىق راستالعان 33 959 جاعداي تىركەلگەندىگىن كورسەتۋدە. بۇگىنگى تاڭدا 100 مىڭ تۇرعىنعا شاققاندا كۆي سىرقاتتانۋشىلىق كورسەتكىشى – 1588,8 قۇرادى.
وبلىس بويىنشا ۆيرۋستىڭ ءوسۋ قارقىنى سوڭعى 2 اپتادا 0,8% - دان 1,0% - عا دەيىن ارتتى. وتكەن اپتادا ەڭ جوعارى ءوسۋ قارقىنى الاكول، بالقاش، ەسكەلدى، قاراساي، قاراتال، كەربۇلاق، رايىمبەك، سارقان اۋداندارىندا جانە قاپشاعاي قالاسىندا بايقالدى.
ەڭ سوراقىسى ءبىر تاۋلىكتە 300 ادام كوروناۆيرۋسقا شالدىققان. كەسەل-جاس تاڭدامايدى. ول اقيقات. بۇگىنگى كۇنى، وبلىستا 14 جاسقا دەيىن 49 بالا ۆيرۋس جۇقتىرسا، 3 ستۋدەنت پەن 30 مەكتەپ وقۋشىسى اۋرۋدىڭ زاردابىن شەگىپ وتىر.
ەس جيىپ، ەتەك جينار ۋاقىت جەتتى. كەسەلدىڭ جولىن كەسۋدىڭ جالعىز جولى-ۇجىمدىق يممۋنيتەت. ونى قالىپتاستىراتىن - ەكپە. ساقتانساڭ، ساقتايدى!.
