Koronavırýs!!! Óńir «qyzyl» aımaqta. Pendeniń úreıin alatyn, jan túrshigerlik sózder ómirimizge enip ketkeli qashan.
Dabyl úni, dármensiz adam, damylsyz qyzmet. Aýrýhana qabyrǵasynda ótip jatqan ómirdiń kórinisi osy. Janyna arasha izdep jatqan naýqastyń muńly kózi, taryqqan dem, qaýqarsyz jannyń taǵdyry aq halattylardyń kásibıligin barynsha synap jatyr. Qashyp qutylatyn jol joq. Óıtkeni ol-indet!.
Senbegender bar-tyn. Áli de bar. Biraq, aqıqaty sol «tájdi tajal» bizdi tastap ketken joq. Janymyzda, muryn ushynda, aıaq astynda jatqanyn biri sezse, biri sezbeıdi. Naqtylasaq, sezgisi de, sengisi de kelmeıdi.
Al, ajalǵa betpe-bet kelgender indettiń baryn joqqa shyǵarmaıdy. Olar bir ólimnen aman qaldy. Eki dúnıeniń ortasynda shybyn jandaryn shyrqyratyp kúresti. Sheginerge jol joq. Óıtkeni, otbasy kútip tur.
Almaty oblysynda da indet órshýde. Statıstıkalyq derekter jaǵa ustatarlyq. Áldekimder, úkimettiń halyqty shoshytý úshin jasap otyrǵan aıla-tásili desti. Aqıqatyna kóz jetkizý úshin, basymyzdy qaterge tigip, táýekel etip, indettiń shoǵyryna kirdik. Oblystyq ınfekııalyq aýrýhanaǵa jaǵdaıdy óz kózimizben kórý úshin bardyq.
Bir kózben qaraǵanda, aýlasy taza, aýrýhana ishi múlgigen tynyshtyq sııaqty. Bul syrt adamnyń qos janaryna syıǵan kórinis. Al, ishki jumys múldem basqa.
Naýqas jatqan bólimge arnaıy qorǵanysh kıimderinsiz kirýge qatań tyıym salynǵan. Aýrýhana qyzmetkeri bizdi kıindirip, qarýsyz maıdannyń ortasyna, jalyndaǵan ottyń ishine jiberdi. Tańdaý bizdiki edi. Shyndyqqa týra qarap, epıdahýaldyń qanshalyqty aýyrlyǵyn sezingimiz keldi.
Hosh, bardyq. Saýytyn asynǵan sarbazdaı, kıimdi kıdik. Áp sátte, tynys tarylyp, dem jetpedi. Bir sát, koronavırýspen aýyrǵandar qaıtti eken? degen oıǵa qaldyq. Óte aýyr. Sózben jetkizý múmkin emes. Jaryq dáliz, sansyz esikter, onyń artynda bir taǵdyrdyń ıesi ómir úshin kúresip jatyr edi. Birazynyń beti beri qaraǵan.
Aq halattylardan buryn naýqastyń ózine, sózine mán berdik. Sóıttikte sózge tarttyq.
26 shilde kúni aýrý belgilerin bergen. Dene qyzýy 39,5 –ke deıin kóterilgen. Dáriniń kúshimen qyzýdy túsirip otyrǵan. Pendelikke salynyp, kovıdke senbegenderdiń biri Aqnur Nurbekova.
Aıtýynsha, 2 tamyzda jaǵdaıy tym nasharlaǵan soń jedel-járdem shaqyrǵan. Test tapsyryp, artynsha indetke shaldyqqany anyqtalǵan.
«Dert óte aýyr dárejede ótti. Aýrýhanaǵa kelerde ózime qajetti kıim-keshegimdi jınaı almadym. Eki ókpem qysqanda «ólgen jerim osy»,- dep oıladym. Eki ulym bar. Solardy kim qaraıdy dep qoryqtym. Qazir betim beri qarady. Densaýlyǵym jaqsardy. Dárigerlerge raqmet. Kúndiz-túni qarap, ajaldan aman alyp qaldy. Aýrýǵa senbeıtinderge aıtarym, bul - qaljyń emes. Qatty órship jatyr. Óz-ózderińizdi kútińizder»,-deıdi Aqnur Nurbekova.
Kádýilgi tamaq aýrýy syndy bastalypty alǵashynda. Vırýs barlyq adam aǵzasyn áp sátte dendep ketedi eken. Oblystyq aýrýhanaǵa túskenderdiń basym kópshiligi jaı ǵana atamaq aýrýy ǵoı dep elemegendikten emhana kerýetine tańylǵan. Solardyń biri Ásel Sabyrbaeva.
«23 shilde aýyryp bastadym. Jutqynshaǵymda aýyrsyný belgileri boldy. Ózim burynnan «Tanzılıt» bolyp aýyratyndyqtan «kovıd» degen oı bolmady. Úıdegi kishkentaılardyń da tamaǵy isip aýyrdy. Olar tez jazyldy. Meniki bolsa asqyna berdi. Kúnde jedel-járdem shaqyrtýmen boldym. Koronavırýsqa test aldy. Oń nátıje shyqty. Sodan aýrýhanaǵa tústim. Tynysym tarylyp, demalýym qıyn boldy. Alǵashqy kúnderi ottegi apparatynyń kómegimen tynystadym. Qazir jaǵdaıym jaqsardy. Men vakına alyp úlgermedim. Eger ekpe saldyrǵanda aýyrý jeńil túrde óter ma edi. Úsh aıdan soń ekpe alamyn. Densaýlyǵym mańyzdy»,-deıdi naýqas.
Biz tildesken qos burymdynyń da aıtqany « COVID-19» bar. Eshqandaı ótirik emes deıdi. «Adamdarmen tyǵyz-qarymqatynas jasaýdan saqtaný kerek, kóshege betaldy shyqpańyzdar, ekpeden qoryqpańyzdar. Ol kerisinshe ımmýndyq júıeni qalyptastyrady»,- dep eki keıipkerde janushyra shyndyqtaryn aıtyp baqty. Den qoıyp tyńdar halyq bolsa, boıyna sińiretin sana bolsa, ólim aýzynan qaıtyp kelgen adamdardyń qateligin qaıtalamaıdy dep senim aratmyz. Eskertý! « COVID-19» - oıynshyq emes.
Qazirgi kezde resmı derekter, Almaty oblysynda osy ýaqytqa deıin KVI zerthanalyq rastalǵan 33 959 jaǵdaı tirkelgendigin kórsetýde. Búgingi tańda 100 myń turǵynǵa shaqqanda KVI syrqattanýshylyq kórsetkishi – 1588,8 qurady.
Oblys boıynsha vırýstyń ósý qarqyny sońǵy 2 aptada 0,8% - dan 1,0% - ǵa deıin artty. Ótken aptada eń joǵary ósý qarqyny Alakól, Balqash, Eskeldi, Qarasaı, Qaratal, Kerbulaq, Raıymbek, Sarqan aýdandarynda jáne Qapshaǵaı qalasynda baıqaldy.
Eń soraqysy bir táýlikte 300 adam koronavırýsqa shaldyqqan. Kesel-jas tańdamaıdy. Ol aqıqat. Búgingi kúni, oblysta 14 jasqa deıin 49 bala vırýs juqtyrsa, 3 stýdent pen 30 mektep oqýshysy aýrýdyń zardabyn shegip otyr.
Es jıyp, etek jınar ýaqyt jetti. Keseldiń jolyn kesýdiń jalǵyz joly-ujymdyq ımmýnıtet. Ony qalyptastyratyn - ekpe. Saqtansań, saqtaıdy!.
