اتىراۋدا كۇيشى رىسباي عابديەۆتىڭ 85 جىلدىعىنا ارنالعان كۇيشىلەر كونكۋرسى قورىتىندىلاندى

1860
Adyrna.kz Telegram

ەكى كۇن بويىنا وتكەن ونەر سايىسىندا 18 كۇيشى باق سىنادى.

رەسپۋبليكالىق ونەر بايقاۋىنىڭ جەڭىمپازدارىن ماراپاتتاعان وبلىس اكىمىنىڭ ورىنباسارى باقىتگۇل حامەنوۆا جانە وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ 70-كە جۋىق شىعارمالار جيناقتالعان دينا نۇرپەيىسوۆا اتىنداعى وركەستردىڭ اۋديو جيناعىنىڭ تۇساۋىن كەستى.

بايقاۋدى ۇيىمداستىرۋشى، د. نۇرپەيىسوۆا اتىنداعى اكادەميالىق قازاق حالىق اسپاپتار وركەسترىنىڭ جەتەكشىسى ساعىنتاي كوپجاساروۆتىڭ ايتۋىنشا، رىسباي عابديەۆ اتىنداعى كۇيشىلەر كونكۋرسىنا رەسپۋبليكانىڭ تۇكپىر-تۇكپىرىنەن ىرىكتەلىپ كەلگەن 18 كۇيشى قاتىستى. ولاردىڭ قاتارىندا ەلورداداعى جوو-لاردان، الماتىداعى ت. جۇرگەنوۆ اتىنداعى قازاق ۇلتتىق ونەر اكادەمياسىنان، قۇرمانعازى اتىنداعى قازاق ۇلتتىق كونسەرۆاتورياسىنان كەلگەن كۇيشىلەر دە بار.

قاتىسۋشىلاردىڭ ونەرىن قازاقستاننىڭ ەڭبەك سىڭىرگەن ءارتىسى ايگۇل ۇلكەنباەۆا، ەڭبەك سىڭىرگەن ونەر قايراتكەرى ايتجان توقتاعان سىندى تالانت يەلەرى باعالادى.


بايقاۋدىڭ باس جۇلدەسى مەن 500 مىڭ تەڭگەلىك سەرتيفيكاتقا اتىراۋلىق «Sarmad» ەتنو-فولكلورلىق ءانسامبلىنىڭ ءارتىسى اقبوكەن تەمىر يە بولدى. ال، I ورىندى تاڭات سادەنوۆ، ازامات شىناروۆ يەلەنىپ، 300 مىڭ تەڭگەلىك سەرتيفيكاتتى جەڭىپ الدى. II ورىندى جانە 200 مىڭ تەڭگەلىك سەرتيفيكاتتى ەربولات حايروللاەۆ پەن قايرات جۇماعاليەۆ تەڭ ءبولىستى. III ورىن مەن 100 مىڭ تەڭگەلىك سىياقى ءانۋار زينەدەنوۆ، نازەركە بازارباەۆا، نۇراي زينورعا بۇيىردى.

ەسكە سالا كەتەيىك، سانيتارلىق جاعدايعا بايلانىستى اتالمىش كونكۋرس فەيسبۋك الەۋمەتتىك جەلىسى ارقىلى ونلاين فورماتتا ءوتتى. ۇيىمداستىرۋشىلاردىڭ سوزىنشە، كورەرمەندەر ايتۋلى ونەر بايگەسىن جەرگىلىكتى تەلەارنالاردىڭ بىرىنەن الداعى ۋاقىتتا تاماشالاي الاتىن بولادى.

پىكىرلەر