Eki kún boıyna ótken óner saıysynda 18 kúıshi baq synady.
Respýblıkalyq óner baıqaýynyń jeńimpazdaryn marapattaǵan oblys ákiminiń orynbasary Baqytgúl Hamenova jáne oblystyq ardagerler keńesiniń tóraǵasy Qatımolla Rızýanov 70-ke jýyq shyǵarmalar jınaqtalǵan Dına Nurpeıisova atyndaǵy orkestrdiń aýdıo jınaǵynyń tusaýyn kesti.
Baıqaýdy uıymdastyrýshy, D. Nurpeıisova atyndaǵy akademııalyq qazaq halyq aspaptar orkestriniń jetekshisi Saǵyntaı Kópjasarovtyń aıtýynsha, Rysbaı Ǵabdıev atyndaǵy kúıshiler konkýrsyna respýblıkanyń túkpir-túkpirinen iriktelip kelgen 18 kúıshi qatysty. Olardyń qatarynda elordadaǵy JOO-lardan, Almatydaǵy T. Júrgenov atyndaǵy qazaq ulttyq óner akademııasynan, Qurmanǵazy atyndaǵy qazaq ulttyq konservatorııasynan kelgen kúıshiler de bar.
Qatysýshylardyń ónerin Qazaqstannyń eńbek sińirgen ártisi Aıgúl Úlkenbaeva, eńbek sińirgen óner qaıratkeri Aıtjan Toqtaǵan syndy talant ıeleri baǵalady.
Baıqaýdyń bas júldesi men 500 myń teńgelik sertıfıkatqa atyraýlyq «Sarmad» etno-folklorlyq ansambliniń ártisi Aqbóken Temir ıe boldy. Al, I oryndy Tańat Sadenov, Azamat Shynarov ıelenip, 300 myń teńgelik sertıfıkatty jeńip aldy. II oryndy jáne 200 myń teńgelik sertıfıkatty Erbolat Haırollaev pen Qaırat Jumaǵalıev teń bólisti. III oryn men 100 myń teńgelik syıaqy Ánýar Zınedenov, Nazerke Bazarbaeva, Nuraı Zınorǵa buıyrdy.
Eske sala keteıik, sanıtarlyq jaǵdaıǵa baılanysty atalmysh konkýrs feısbýk áleýmettik jelisi arqyly onlaın formatta ótti. Uıymdastyrýshylardyń sózinshe, kórermender aıtýly óner báıgesin jergilikti telearnalardyń birinen aldaǵy ýaqytta tamashalaı alatyn bolady.
